黎明立春空降「全身想旅行」 一日即登熱門第一位
網民一面倒好評：唯一上咗神枱嘅藝人 純係讓觀眾聽得開心

「呵～個肚都想旅行～呵～我血管想旅行～呵～我眼睛想旅行」

「四大天王」黎明（Leon）噚日（4日）無啦啦喺YouTube空降最新惡搞單曲《全身想旅行》，由Ex「腦細」林日曦操刀改詞，為呢兩年冇得去旅行嘅香港人宣洩一下情緒，仲上埋YouTube熱門第一位！

黎明就喺Facebook同大家拜年，同埋解構新歌，希望「送給大家去分享兼回憶今次疫情給大家的所有經歷」，又話「我想牙痕痕斷估預言今次聽完此曲不超過60天便可將佢拋諸腦後成為過去式，往後亦無需再聽，因為疫情也只是我們生命中的一點具挑戰性的小過客」。

林日曦就喺Facebook講返呢首歌嘅起源，就話「唔知佢係貪玩定係屁股痕癢，定係話佢想氹吓大家開心啦我唔知，竟然打嚟話想重新錄一次《眼睛想旅行》」。

「你想錄《眼睛想旅行》，咁你咪去錄《眼睛想旅行》囉，同我講做咩呢？佢話想重新填過啲詞，哦原來係咁，所以就出咗今日出街嘅呢首《全身想旅行》」。

至於點解首歌得半首？其實係「因為我自己（林日曦）懶，但又唔好意思話自己懶，所以我就話：呢啲歌，唱半首最好，到喉唔到肺咁，個效果先最好」。不過Channel絲覺得就算得半首，大家都會好收貨，因為係天王大彩蛋！實在太開心了！

新歌可以話係零死角！有網民就喺YouTube留言話，「黎明係四大天王唯一上咗神枱的藝人，佢出新歌巳經完全唔需要考慮市場因素，純係讓觀眾聽得開心」，仲讚「Leon真係疫下心靈雞湯，安撫了大家，你的堅持進步令我們感動！」。

#channelchk #黎明 #全身想旅行 #眼睛想旅行 #林日曦