ViuTV《賭命夫妻》被斥教人分妻 意識不良
通訊局收40宗投訴 批節目「鼓吹婚外情 太咸」

ViuTV真人Show《賭命夫妻》搵嚟5對夫婦，透過「交換配偶」挑戰唔同項目，希望重燃佢哋嘅愛火，例如老公要抵擋性感美女色誘、亦要應付主持及嘉賓的挑撥離間。因為內容惹火，開播個幾星期，除咗掀起網上激烈討論，亦都有觀眾質疑「換妻」唔道德、價值觀扭曲、意識不良等等⋯⋯仲去通訊局投訴添。

除咗平時嘅「胸壓」、撫摸色誘畫面，最多人討論嘅一集應該係早幾日嘅「快樂船P」。嗰集節目照舊搵嚟「PTGF」挑逗人夫，仲睇吓人夫們Pass唔Pass到「計中計」。而其中一對夫妻Dennis同Teris，就被安排由老婆Teris扮演PTGF，同蒙上雙眼嘅Dennis玩嘴對嘴食軟糖遊戲，睇吓對方有咩反應。結果Dennis「情難自禁」，玩到嘴掂嘴仲錫埋落去，嬲到Teris怒摑老公一巴，仲大鬧「好失望」。

Dennis事後嘗試解畫，話其實佢一早知道位「PTGF」係老婆⋯⋯但除咗老婆之外，一眾網民亦都唔受落。網民除咗鬧爆Dennis之外，亦都有話節目組離間夫婦感情「可恥」。不過亦都有觀眾覺得，一段感情如果咁經唔起考驗，咁其實本身都有問題，而節目組其實都有安排返夫婦二人對談，已經「做到盡」。

Channel C則向通訊局查詢。局方指，節目由開播至今，一共收到40宗投訴，投訴人主要認為節目內容低俗、過於色情、意識不良及鼓吹婚外情，該局會按既定程序處理有關投訴。

#channelchk #ViuTV #賭命夫妻 #真人騷 #換妻 #換夫 #快樂船P

反同組織立會示威 促TVB停拍《仔仔一堂》
趙佩玉屈hehe勁播甲肝：將「污糟嘢」擺入口

ViuTV 《賭命夫妻》由開播到差唔多播完，到而家都仲係話題節目，Channel絲以為已經好犀利啦，但有個節目仲勁，播都未播就引嚟唔同團體嘅口誅筆伐⋯⋯咪就係TVB 嘅男男配對真人騷《仔仔一堂》囉～

繼周二（26日）一班家庭、宗教組織大鬧批評《仔仔一堂》不道德、埋沒良知，灌輸有違聖經的歪理，喺網上發起聯署要求TVB停止製作節目後，今日一班反同團體仲去埋立法會外示威，批評《仔仔一堂》涉及男男配對，代表香港同性戀解放的情況已經十分「嚴峻」。

反同組織「性傾向條例家校關注組」成員趙佩玉仲話，甲型肝炎嚴重係因為「男男性行為，將啲污糟嘅嘢擺入口」，要個節目即刻停拍。除此之外趙佩玉仲鬧埋ViuTV嘅《賭命夫妻》「好淫亂」、「好污穢」，又話《大叔的愛》荼毒年輕人⋯⋯而之前反對「同樂運動會」舉行嘅建制派議員何君堯有份接組織嘅請願信，佢繼續大鬧「同志平權人士破壞綱紀」，但就無乜點發表對《仔仔一堂》嘅睇法。

小編借此提提大家，即使為異性口交，只要清潔不足和不戴好安全套，同樣是「將啲污糟嘅嘢擺入口」，一樣有機會感染可經性接觸傳播的疾病，包括甲型肝炎。要做到安全性行為，無分性傾向，只關乎良好性教育。

其實《仔仔一堂》引嚟反同團體關注，有幾位節目參加者早前已經喺網上吐心聲，其中藍源瑋（Juzco）話，其實絕大部分同志都唔希望呢類節目喺無綫播出，但覺得「整個節目目的是希望對同志/LGBT有偏見或不接納的人去看」，所以無綫可能係一個更合適嘅平台，畀佢哋嘗試去接納同性戀。

而《仔仔一堂》原本預計11月會喺J2播出，但上周播出嘅《TVB節目巡禮2022》竟然無晒佢哋嘅相關介紹，引嚟外界猜測節目會唔會臨時被抽起，不過TVB就話唔會就有關揣測作出回應，而J2創意總監C君就話「唔係我一個人決定播唔播」，唔知到底最尾趙女士有無機會睇住嚟鬧呢？

#channelchk #ViuTV #賭命夫妻 #TVB #仔仔一堂 #反同組織 #無綫 #投訴 #示威 #C君 #何君堯