5人港鐵車廂竹戰 打足7個站冇職員阻止

為咗打牌，可以去到幾盡？屋企唔打得，鄰居投訴；屋企樓下唔打得，藍色制服人會趕你；酒樓雀局污煙瘴氣，麻雀館要用安心出行。要夠冷氣又夠地方有燈光而且就腳方便麻雀腳返屋企，有人竟然諗到，喺港鐵打。唔係站內，係車內。

網上流傳影片，港鐵車廂內有乘客開局，仲俾好多人圍。圍埋嚟睇。港鐵證實，上周三（13日）有5名男子於旺角站上車後打麻雀，到彩虹站先至收枱落車。計番車程，只需15分鐘。如果冇「站長」阻住，都打到一兩鋪嘅……

睇番條片，呢5隻雀友真係好認真，真係有麻雀枱，冇凳就踎或者企，4人專心疊牌甩牌如入無人之境。嗰陣係朝早十點幾，唔算多人，但阻到人。不過當時冇乘客制止，只係埋嚟睇。足足7個站，都冇港鐵職員上前制止。

諗深一層，經歷咗咁多，而且對港鐵有咁深刻難忘嘅記憶，而家香港人對各種奇行可能已經見怪不怪。早兩個月有大媽成罐石油氣搬上車，由佐敦站搭到葵芳站，咁啱又係朝早十點幾非繁忙時段，坐足9個站都冇人制止。

其實港鐵車廂裡面打牌都唔係首次，16年就有班YouTuber拍咗條《打雀英雄》片，講香港土地問題，冇地方竹戰，成班人就由馬路中心打到去港鐵車廂，打足成條將軍澳綫。條片出街之前，單嘢已經上晒新聞，奇在佢哋又係揀朝早10點幾呢個時段。當時有乘客喺寶林站向港鐵投訴，職員將軍澳站上車，只係見有乘客拎住麻雀板同麻雀，但對方否認在喺車廂打牌。職員無奈，惟有放生。

好喇，咁喺車廂打牌有咩後果呢？根據港鐵行李規章，乘客攜帶的行李尺寸（長、闊及高）的總和須不超過170厘米，而任何一面的長度亦不可超過130厘米，超出規定的行李均不可帶進車站付費區，違者罰2千；附例第25條就列明，乘客不得作出對其他乘客造成滋擾的行為，違者可被罰款5千元。

跳閘最高罰款都5千蚊啦！

#港鐵 #打牌 #港鐵打牌 #打麻雀 #港鐵附例 #土地問題 #channelchk