《造星IV》Sica執生成功大加分 A4組大型走音現場：點做女團呀

相信有睇噚晚《造星IV》嘅大家，都對Sica嘅執生能力表示讚嘆，甚至要好似花姐咁樣讚Sica「叻女叻女叻女叻女叻女」。本身兩組嘅自選項目都唔係好得到評判嘅讚賞，但係Sica好似為B組帶返少少希望，加上B4組指定項目表現有起色，唔知會唔會可以一隊救全家，拎返一分，唔使額外再foul人呢？

A4組子涓、Ada仔、安希婷、Ariel同埋Carmina嘅自選項目《Lady繽紛樂》，嘗試帶返觀眾同埋評判返去Broadway嘅年代。花姐就喺綵排嘅時候大踩A4，直接話「你哋五個輸L梗」，令到佢哋都覺得就算輸都輸得心服口服，因為大家都不在狀態咁話喎。睇完表演，安仔就覺得佢哋「未係好夠唱功嘅功架，去駕馭呢啲咁classic嘅歌」，而卓韻芝就直情話睇唔到A4組《Lady繽紛樂》入面嘅繽紛。

B4組就好似俾人落咗降頭咁，暐翹 扭傷條腰，Liu哥就疑似氣管敏感，東東同Sica就一直都肚痛，不過原來最驚險嘅事，on show先出現。Sica喺自選項目《Come on, Bad Boy》入面，一個起身唔覺意向前仆，正當所有人都嚇親嘅時候，Sica繼續跪喺度跳埋幾拍先起身，唔知仲以為呢個位都係安排過，執生能力爆燈。

去到指定歌曲《來自天堂的魔鬼》，A4組嘅表現搞到導師同埋評判一路睇一路皺眉頭，安仔點名批評子涓失準之外，卓韻芝仲話佢哋「有少少似考完會考，考完喇……」嘅感覺。

B4組嘅表演就同A4組感覺截然不同，Sica利用佢喺cosplay累積嘅經驗，幫組員變身成為八十年代日本街頭少年，將指定歌曲變成街頭打鬥場景。表演後，強尼都話要再次介紹組員，而喺死亡名單上嘅Liu哥，一句霸氣嘅「叫我Liu哥」即時引起B組嘅尖叫。評判們畀B4組嘅好評幾乎一面倒嘅，卓韻芝原來一直好期待呢種「有啲幽默感」嘅表演，吳雨霏就覺得B4組「可以好麻甩咁樣好型，覺得好好睇」。唔知最後，會係foul走兩次喺淘汰邊緣嘅Carmina，定係咁有霸氣嘅Liu哥呢？

#channelchk #全民造星IV #ViuTV #女團 #Sica #暐翹 #Liu哥 #東東 #Carmina #Ariel #子涓 #Ada仔 #安希婷 #梁祖堯 #死亡名單 #卓韻芝 #On仔 #花姐 #吳雨霏

《造星IV》25強開戰 人質式死亡名單首踢東東
評判大讚CK改編主題曲：已經睇到個女團

《造星IV》嚟到第30強升25強嘅回合，而喺今輪比賽每一局開始前，都會公佈每組5位跌落死亡名單嘅參賽者，而呢5位係有先後次序嘅，而導師揀嘅人未必係即刻上台嘅人，即係一個「人質式死亡名單」。要留意嘅係，即使被踢出局，嗰名參賽者都係要完成埋自己嘅項目先可以正式say byebye。喺呢個長期咁高壓嘅氣氛下，連A組導師許廷鏗都要話「唔鍾意呢個節目」。

A1組由7個出名跳得嘅子涓，芯駖，超酸，Win Win，So Ching，Marf，CK組成。Marf俾組員捧上神枱，話有佢嘅組就一定贏，雖然Marf去到比賽當日都仲係好唔舒服，但睇落都冇影響表現。喺自選項目環節，CK用咗三日重新改編《造星IV》嘅主題曲，再分畀組員揀段同埋填詞，一出場就已經震攝全場。呢組唔單止跳得，仲好唱得，連一向牙尖嘴利嘅節余迪偉都話「已經睇到個女團」，讚佢哋又齊又夾。導演黃修平都大讚「成個package好高水準，睇唔到有瑕疵」。

而B組自選項目就全家總動員上陣，決意要救死亡名單第一人嘅東東。B組一如既往都係揀咗以戲劇性及訊息為主打，演繹咗一個好沉重，好值得反思嘅《浮雕》。雖然B組用晒道具同埋三個比較唱得嘅組員做「主角」，似乎都唔係好掩飾到佢哋整體上歌唱能力嘅不足。雖然黃修平眼濕濕咁讚B組表現「冇得唔撐，好感動」，但係余迪偉直言「唔知點解前面三個歌星都冇評論過歌唱」，又話「東東你係好勁，對唔住，唱得唔夠好，聽唔到你唱乜，I’m so sorry」。連近排俾網民大轟嘅梁祖堯都覺得去到呢個回合，「唔係再用掩眼法」。

最後A組以4藍1紅贏出呢個回合，所以好有觀眾緣嘅東東就喺呢度止步，A組就成功救到佢哋嘅死亡名單第一人Ika。東東係因為呢個比賽先第一次接觸唱歌跳舞，不過佢就話「唔似參加緊一個比賽」，開心識到好好嘅朋友，好好嘅導師，非常感恩咁話。呢個回合嘅賽制底下，被淘汰嘅人都要完成埋賽事，相信大家同Channel絲一樣，都好期待東東嘅告別式。

#channelchk #viutv #全民造星 #全民造星IV #子涓 #芯駖 #超酸 #WinWin #SoChing #Marf #CK #東東 #Ika #余迪偉 #黃修平