《造星》史上最年輕對決
16歲燒賣搏盡無悔 憑搞笑投入險勝女團人選阿妹

ViuTV真人選秀節目《全民造星IV》噚晚（2日）上演咗《造星》史上最年輕之戰。兩位年僅16歲嘅參賽者燒賣（曾業喬）同阿妹（黃敏蕎）仲讀緊書，燒賣更承認要受家庭壓力，要考到全科合格，三科要頭十名先可以參賽，結果首輪比賽亦成功晉級：「好想行我自己行嘅路，我都想話畀佢哋知，唔一定書本上嘅嘢最有用」，仲話「我唔會褪後，我都行咗。」

年紀最細嘅燒賣同阿妹喺節目入面深受幕後人員歡迎，有幕後更自爆係「燒賣關注組」，個個都大讚佢可愛。但燒賣承認家人唔支持佢比賽，覺得佢參賽係發明星夢，「佢哋唔係好睇得起我」，但佢仍然好想比賽，所以同家人協議全科合格，三科要頭十名先可以參賽，結果佢達成目標。被評判問到贏咗之後係咪唔讀書，佢都搏盡無悔咁話：「所有後果都要我承擔，而我已經有心理準備。」

而燒賣噚晚嘅表演項目係《今朝有啲唔舒服》，既有演戲又有唱歌，演出之後佢話：「我係一個鍾意引人笑嘅人，見到人笑我會覺得好滿足。」結果佢嘅表演深得評判讚賞，認為係目前唯一享受表演嘅參賽者。

至於阿妹都話屋企人對佢參賽係一半支持一半擔心學業，但佢仍好想做歌手，所以參賽：「由細到大冇乜嘢自己鍾意好耐，但唱歌係由細到大都鍾意唱。」佢首輪淘汰賽就演唱《記得》，雖然被視為擁有女團成員條件，但喺兩個只能活一個嘅賽制下，結果由燒賣勝出；阿妹就跌落復活區。

上年參加過《造星III》嘅子涓（夏子涓）亦有參賽，曾經係女團BINGO成員嘅佢因為對女團無興趣，所以出錢同公司解約，結果今年行返轉頭，參賽加入女團。面試時花姐都質疑「你而家話畀我聽你想做女團？」不過子涓就話佢會信任嚟緊嘅女團團隊，仲話唔嚟參加都唔知結果。而上年嘅客席導師、今屆導師梁祖堯同上年導師之一嘅林二汶都非常關心子涓，希望子涓今年能夠成功。

子涓最後跳唱演出欣宜嘅《@princejoyce》，至於走文青路線嘅對手陳祖（陳祖兒）就演唱原創歌《做人一定要養貓》，佢嘅風格都得到唔少網民歡心，但最後以三盞藍燈輸畀子涓，落入淘汰區。

#channelchk #ViuTV #全民造星IV #燒賣 #曾業喬 #黃敏蕎 #阿妹 #女團 #陳祖 #陳祖兒 #子涓 #夏子涓