另類海陸空賀十．一
華記正能量帶五星旗潛落海底

十月一日，一個咁重要嘅日子，為表示嗰種興奮心情、「要讓全世界看見」，香港政府亦曾舉辦「海陸空」形式慶10.1。海，係指船船舉旗鳴笛。但有一顆赤誠愛國心嘅華記正能量，佢闡釋「海陸空」有啲唔同，佢係直接連人帶旗潛落十米深海底，讓五星旗飄揚。

華記正能量（即「華記餐廳日本」）FB page今日share咗呢條正能量嘅最新YT片，標題名為「華記10月1號呈獻：香港🇭🇰海陸空五星紅旗迎風飄掦！鋼鐵洪流進行曲！華記正能量創作室特別呈獻」，片長3分鐘左右，短過條題。

華記正能量今次真係帶住五星旗上山下海，第一站係落水。

光頭嘅華記就如漆黑裡面嘅螢火蟲，即使海底再深再黑，一樣認到佢，唔難搵。同潛仲有一位傷健人士，負責喺十米深水底孭住支五星旗奮力游，華記負責上鏡。Channel 絲唔明白帶埋支旗潛落海底係咩意境，有啲網民就話「大吉利是」，有人話聯想到水災……「華記總係唔會令人失望」，都有人咁講。

負能量留言喺正能量嘅page當然睇唔到，你見到嘅只係一排排機師集體出征踴躍祝福祖國。至於空同陸點玩，分別帶住支五星旗駕滑翔傘同電單車。人哋華記正能量連人帶旗潛入海底與污水共舞，相信祖國收到祝福一定好開心。至於支旗上番水之後有冇污糟，有冇違反國旗法，大家唔好過份聯想。

講起聯想，其實華記真係藝高人膽大。事關最近某些人士都對大海、船、搵嘢呢啲字眼/畫面好敏感。繼麥當勞之後，愛國人士對勞力士（rolex）上月初嘅「水鬼」廣告都好敏感，遭撐警人士質疑不尊重殉職女警，呼籲警員「唔好戴撈」。

呢款俗稱「水鬼」嘅勞力士錶款Submariner，1953年面世。新廣告就係sell隻表，普通人如Channel 絲都get唔到廣告中有何不尊重之意，有網民留言：「勞力士呢個時間出個咁樣嘅post水鬼系列，可唔可以尊重下」，質疑IG管理員「係咪逃亡去外國嘅ＸＸ」。

今次華記係水底搞活動，擔心佢會被部分人士批鬥呢！
#十一 #國慶 #華記正能量 #五星旗 #Rolex #channelchk