又學到嘢！
兩年冇交電費黃錦星大教慳電大法 28°C先考慮開冷氣

早排中電同港燈都宣佈加價，環境局局長黃錦星今日（12號）就喺電台節目「教精」大家慳電妙計，仲曬命話上次交電費已經係兩年前交嘅11蚊雞，仲平過搭地鐵過海。

黃錦星喺節目大談身世，有7個兄弟姐妹嘅佢，喺深水埗板間房長大，所以由細細個就學識「節儉嘅美德」，仲話慳電是幾十年嚟的習慣。加埋政府嗰50蚊電費紓緩金下，對上一次交電費已經係兩年前嗰11蚊雞。唔講唔知，得睡房有冷氣嘅黃局長原來過28°C先會考慮開冷氣，Channel絲睇一睇天文台數據，咁即係局長上年全年開冷氣嘅晚上少過50晚，唔夠兩個月。服啊。

黃錦星仲讚唔使交電費嘅家庭係「慳神」添。「慳神」嚟講，點可以唔計前天文台台長林超英？嚟緊氣溫急降，大家可以參考下「古法禦寒」，用暖水袋暖被窩，再幫雙腳保暖～或者直接「靠自己」唔沖熱水涼，用30°C嘅水沖1分鐘涼好喇！

笑就講完，Channel絲提提大家記住睇住身體，唔好冷親啊～

#channelchk #黃錦星 #電費 #慳電 #林超英 #轉涼 #環保 #天氣