七仙羽遭冒名出產品 3千蚊條「師傅愛你」水龍珠
自稱苦主網上唱衰7cfu拒對質

七連閃電鞭！一定要用七連閃電鞭！！

「非常嬲！」7cfu一開波就係呢句，齋睇字都feel到cfu嘅怒火。事件就係，有人冒充cfu、出各式「師傅愛你」product，有月餅有水龍珠。咁cfu梗係冇錢收啦，佢都唔係代言。但最荒謬嘅係，有自稱苦主嘅鄧小姐聲稱，6月向「七羽仙」買咗條3千幾蚊嘅水龍珠，錢已付貨遲遲未收到。於是，鄧小姐就上網鬧爆師傅…

cfu就梗係勁嬲，自己俾人冒認，呃咗人錢，但俾人鬧嘅係自己。cfu嬲到去搵呢位苦主對質，要求佢澄清有關言論，因為呃佢嘅真係唔係cfu。

「知道有人冒充我，她應該對我說對不起，而且要澄清一下對嗎？但她的行爲令我非常非常不可思議！！！」cfu成個fb post係咁瘋狂用3個感嘆號嘅組合，七連閃電鞭嘅級數！！！

cfu為證明真身，DM對方兼錄音留言，證明真身，要求鄧就網上有關言論同道歉，鄧小姐堅稱唔信佢就係cfu；之後cfu打俾佢，唔聽，但有用文字回覆留言，聲稱要報警，又質疑cfu：「你說不是你就不是你嗎？」「你應該致電那個冒充你名字的人」

鄧小姐回覆cfu嘅DM表示，同事向自稱「七仙羽」嘅人買咗條水龍珠，鄧小姐覺得有功效，於是又買。6月21號俾咗3千幾蚊，到而家都未收到貨。7cfu追問鄧小姐有冇對話紀錄或單據，冇回應。
所以cfu嬲到要喺網上出po。咁又係，cfu嘅口音，點扮呀？叫鄧小姐上佛堂當面對質，佢又唔肯。大拿拿3千幾蚊喎！

cfu接受Channel C訪問時，餘怒未消：「而家網上好多人冒充我賣嘢，『師傅愛你』嗰啲產品，我從來都冇出過產品。我都冇所謂啦，由佢啦。總之我唔會搞呢啲嘢。」

cfu話，鄧小姐明知cfu都係受害者，但堅拒就網上抹黑言論道歉，更拒絕澄清。「我問邊個呃佢，佢吚吚哦哦；我問佢點解唔直接搵我、點解唔信我，我話我喺七師傅，佢都唔信，我覺得佢係好唔啱邏輯。」鄧小姐既唔聽電話又唔肯見面，亦拎唔出證據，令cfu開始懷疑，究竟呢個自稱苦主嘅人，係咪真有其人。

「搵我好容易，我把聲實認得。我覺得佢好有問題，都唔知真有呢個人定係假。問都唔問吓就唱我？佢明明可以搵到我，點解唔搵我？我叫佢澄清，佢又唔肯。」

今舖七連閃電鞭可能加到一百鞭都唔夠…

#師傅愛你 #水龍珠 #7CFU #七仙羽 #抹黑 #打手 #channelchk

兩公婆開Live講浪漫
朱慧敏慶幸38歲先識醫生老公 感激七仙羽雪中送炭

嫁得早不如嫁得好，緣份永遠嚟得啱啱好。故事中女主角，38歲認識現任丈夫。男方係醫生，42歲，養和心臟科專科名譽顧問醫生，港大名譽臨床助理教授，人稱「鑽石筍盤」。女主角當然都係筍盤，精於理財投資，只係有時睇人眼光欠準。兩人今年2月成婚。喜帖上印著一對新人幸福名字：陳良貴 Queenie Chu 朱慧敏。

日前兩公婆又開Live，兩人鏡頭前擠在一起，朱慧敏不顧儀態的笑得前仰後合。網民問她陳醫生是否對太太一見鍾情，陳醫生靦腆點頭，朱慧敏代答：「係。」

丈夫是否浪漫？佢就話：「浪漫。佢嘅浪漫係好實在嘅浪漫，令我個心覺得好安定。佢嘅浪漫係，未拍拖嘅時候已經問我：『我想同你拍拖；到拍拖一年，第二年我就會娶你。』但係嗰陣時係未拍拖，只係食咗幾餐飯，拖手仔都冇。」陳醫生輕聲反抗：「我有拖你手仔呀！」朱慧敏記得好清楚：「你講嘅時候係未拖。」陳諗咗陣，天然呆答：「係喎。」

「人人對浪漫嘅定義唔同，每個年紀對浪漫嘅定義都唔同，我以前都係好少女…而家都係，嘩好想放煙花有花收…」此時陳醫生又企圖反抗：「我有送呀…」朱慧敏就話：「好開心，多謝你呀！佢係送一支花。」陳醫生話環保，朱又大笑：「啱呀啱呀，我真心係好欣賞。佢嘅浪漫就係咁。」

「我好慶幸我38歲先至認識你，39歲先結婚。而家先認識你係好嘅。」講到呢度，朱慧敏又狂笑。陳醫生補飛：「如果你細個認識我嘅話，就可能會覺得……」朱笑：「都覺得好好囉！」

這位04年港姐亞軍，情路如坐過山車，當選後翌年被爆和梁榮忠在車廂親暱，形象受挫；11年與EO2成員彭懷安（Eddie）拍拖。訂婚後Eddie被爆偷食，最終分手。

有網民留言忽然提起 七仙羽七師傅謂：「早喺2010年，七仙羽師傅幫你批命甲，話你嫁得好，老公係權威人士（下刪一萬字）嫁得早，不如嫁得好，恭喜！恭喜！」

原來呢度又有個小故事。「嗰陣我同七師傅，大家未見過大家，唔認識大家，亦冇共同朋友，佢公開喺報紙幫我講好説話，我好感謝佢。喺低潮時，有人幫口支持下、鼓勵下，真係好感動，雪中送炭。之後（隔咗好多年）我喺慈山寺遇到師傅，我親口多謝佢。佢而家超級紅，我戥佢好開心，好心有好報。」朱慧敏寫道。

風水命理，信不信由你。但能夠雪中送炭，懂得感恩，也是一種浪漫。

#朱慧敏 #七師傅 #師傅愛你 #七仙羽 #陳良貴 #養和醫生 #channelchk