拖拉23年旺角道天橋啟用2周 即封電梯「保養」
網民笑「未冧已經算贏」

耐過興建埃及胡夫金字塔、印度泰姬陵，而被譽為「世界級偉大工程」嘅旺角道行人天橋，啟用咗兩個禮拜，今日其中一條扶手電梯就封咗要「休養」，梯口棟咗個寫住「保養工程 暫停使用」嘅牌，途人要上落就唯有行樓梯，或者行多幾步搭電梯。

工程歷時近23年嘅一段旺角道行人天橋喺上月30日終於啟用，天橋橫跨至彌敦道，連接原有嘅行人天橋。不過，呢個偉大工程用咗冇耐就有扶手電梯要保養，次文化堂社長彭志銘今日經過時就影咗相喺社交平台出post，話畀大家知：「用了20多年興建的世界級偉大工程，呢條旺角道天橋，啟用不及兩星期，電動樓梯，打咗柴矣！」

唔少網民都留言講笑，形容係貴價豆腐工程特色，話「未冧已經算係贏咗」，不過亦有人問係壞咗定係例行保養，「因為電梯師傅好鍾意落咗個圍欄就走咗去。有時可能例行保養」咁話。

無論係壞咗定保養都好，旺角道行人天橋啟用前後都帶畀大家唔少話題。首先係佢嘅興建時間比耗時約20年興建嘅埃及胡夫金字塔、歷時21年建成嘅印度泰姬陵仲要耐之外，佢啟用頭幾日，有市民都發現天橋其中一部電梯內，開門關門按鈕竟然同標示字眼有出入，「開門」掣嘅圖形竟然是閂門，標示字眼為「關門」嘅掣反而係開門，結果又引起熱議。路政署之後只話，有關錯誤按鈕已修復好。

#channelchk #旺角行人天橋 #旺角道行人天橋 #保養 #維修 #彭志銘

＝＝＝＝＝＝＝＝＝＝=＝＝＝＝
🔥出氣師登場！「谷鬼氣、搵我哋」🔥
如果大家有咩疑難「谷鬼氣」，不妨搵我哋「出氣師」，等我哋幫手出返口氣！
出氣WhatsApp： https://wa.me/85263544742