宣明會拍片為「又煙又酒」受助人解畫：
捐款用於社區發展比直接畀錢更有幫助

宣明會助養人揭發其受助兒童「又煙又酒又跑車」後，該兒童反稱從未申請助養，事件引起社會關注。宣明會噚晚（8日）就喺facebook專頁上載香港世界宣明會總幹事馮丹媚回應嘅影片，話助養兒童嘅捐款係用於發展兒童所住社區，「相信咁做比直接畀錢佢，對佢幫助會更長遠同持久」；又話事件中嘅受助兒童父母清楚知道捐款唔係直接畀錢小朋友，而係將資源用於社區。

有網民周日（5日）喺fb出post，話好多年前已經開始助養小朋友，直到近期見到「小朋友」個樣仲大過自己，就上ig搵吓，結果發現個「小朋友」又煙又酒又車！經聯絡後，對方更唔知助養一事，而且仲開口向網民索錢。

事隔3日，宣明會噚晚喺fb上載馮丹媚嘅解畫片段，稱周一（6日）早上留意到涉事助養者嘅fb帖文後，已即時聯絡助養者及阿爾巴尼亞辦事處，剛接獲消息指當地人員已到該助養兒童家中，向兒童及其家人了解事件。

馮丹媚話該助養兒一直住喺Korçë社區，而宣明會2009年起喺Korçë開始社區發展項目，主要包括基礎教育、建設、水利及改善生計嘅工作，幫當地家庭改善生活及為兒童營造更好嘅成長環境，「我哋相信咁做比直接畀錢佢，對佢幫助會更長遠同持久」。馮又話該助養兒童嘅父母清楚知道，宣明會唔會直接畀錢小朋友，而係將資源投放社區作發展項目。

佢仲話宣明會撥款係會先去到社區睇實際需要，了解社區會點發展並評估，才投放資源，又會要求當地定期提交監察及報告。佢呼籲助養者如有疑問，可致電及發電郵畀宣明會跟進。

不過，唔少網民對宣明會解釋都唔收貨，有網民話「這樣就不是助養兒童，而是捐款發展社區項目。那就別拿兒童配對來招搖撞騙」、「講到明係助養小朋友，但而家就話係搞project? 如果啲錢係落咗啲地區project嗰度，咁個兒童本身（又或者有幾多個兒童）根本就無關係。咁點解你哋年年寄張小朋友嘅相畀我，而唔係寄張當地『社區發展』嘅相比我？原來呢十年黎我都係懵醒醒。」

但亦有人支持宣明會做法，認為建設社區更有意義，亦有網民指若真正了解過助養計劃，就應該理解捐款唔係直接畀小朋友。

#channelchk #宣明會 #助養兒童 #受助兒童 #又煙又酒又跑車 #助養 #NGO #社區發展 #阿爾巴尼亞 #慈善團體