媚姨處女catwalk！譚仔×HKDI學生時裝騷
沈殷怡高衩裙曬美腿曲線 Jessica C.制服誘惑

媚姨俾ViuTV《阿女又戀嚟》捧紅咗，原來佢除咗有喜劇細胞、口才了得，仲有行catwalk嘅潛質！話說譚仔搵HKDI知專生，搞咗個「2046未來制服」時裝騷，慶祝嚟緊開業25周年，唔止搵嚟名模馬詩慧Janet同Jessica C.，以及Viu TV女神沈殷怡Shirley同劉沛蘅Hillary，一齊扮譚仔姐姐，以「制服誘惑」上陣，仲搵埋媚姨行天橋。媚姨經馬詩慧指導之後，可謂驚艷全場！

譚仔拍低咗呢場時裝騷，放上網畀大家睇。名模Janet着住生菜造型上衣同貼身剪裁長褲，率先登場。設計靈感係同大自然融為一體，將生菜融入設計，寓意譚仔嘢食新鮮，即叫即製，配合埋譚仔綠黃主色調。Janet大讚個騷好過癮：「製作十分認真，大家當正是真正的時裝騷去做，非常好玩！以前行騷真是當吃生菜，今次真是一棵生菜放在身上，十分新鮮呢！」Janet仲身兼時裝騷嘅編排總監同模特兒導師，教佢哋行騷秘訣。

至於Shirley着嘅係富有現代東方美學嘅新派旗袍，將經典嘅譚仔話展示喺旗袍；高衩裙獨特剪栽讓佢大騷美腿。喺台上充滿自信嘅Shirley話：「譚仔吃得多，但穿上身又是甚麼玩法呢？哈哈……不過我向來都有積極操fit，這副身形穿甚麼也carry得到呢！」

Hillary就以一身宮廷look現身，行可愛路線。負責設計嘅學生希望套衫帶出譚仔姐姐除咗親切同富人情味，亦可展現氣質同可愛。Hillary話同家人經常食譚仔，「今次穿上設計學生為譚仔姐姐設計的作品，感覺特別又有趣，同台還有不少知名模特兒，當然要向Janet偷師」。而以「譚仔遮遮」cyber造型示人嘅Jessica C.，就以美式口音嘅譚仔話講咗句「我係譚仔姐姐」，令全場爆笑！

媚姨雖然首次行天橋，但備受矚目！佢着上素食主義制服；芽菜設計嘅上衣配生菜長裙，喺片入面爆出不少搞笑對白：「真是亂來的，找我來行時裝騷，又不是要我做譚仔姐姐，又沒有男生給我挑選，真的不知道找我來做甚麼！」當譚仔國際集團主席兼行政總裁Daren以「時尚教主」造型壓軸出場後，媚姨再爆金句：「嘩，呢個男仔幾型喎，返去介紹畀阿女識先！」

#媚姨 #ViuTV #阿女又戀嚟 #catwalk #譚仔 #HKDI #知專 #時裝 #名模 #馬詩慧 #JessicaC #沈殷怡 #劉沛蘅 #channelchk

真・譚仔姐姐着潮爆制服行Catwalk
譚仔CEO戴黑超驚喜出場

之前報道咗譚仔同香港知專設計學院（「HKDI」）合作嘅「譚仔姐姐2046未來制服」Phygital 時裝騷，見到名模Jessica.C 、藝人沈殷怡（Shirley） 等等靚爆舞台，其實個Show仲有幾位真・譚仔姐姐行Catwalk，仲一啲都唔輸蝕㗎～

参加嘅有「譚仔姐姐首席KOL」紅梅姐、「葵芳店店長」菊姐、「彩明店店長」進姐、「東涌店店員」珍姐與「樂富店店員」鈴姐，佢哋着上HKDI學生的設計作品行上天橋，好似平時做嘢一樣咁專業！Channel絲私心最鍾意「葵芳店店長」菊姐嘅裝扮，改良過嘅旗袍除咗完美襯托出譚仔姐姐嘅氣質，湖綠色嘅線條更令人諗起二次元偶像初音未來，夠哂「2046未來制服」！

有一班型爆嘅譚仔姐姐，又點少得譚仔哥哥呢？譚仔國際集團主席兼CEO劉達民（Daren），戴住副黑超以「時尚教主」造型壓軸出場，引嚟全場歡呼。親民有嘅佢未埋位嗰陣已經逐一向各模特兒問好，仲同鋪排、指導場騷嘅Janet Ma有講有笑，跳吓舞咁。

今次制服設計比賽嘅勝出學生，將會為譚仔設計2021年全新制服，並獲得獎學金，以繼續修讀與藝術創作有關的課程，而部分表現優異的學生都會獲得廣告公司的實習機會。Daren話，譚仔除咗專心做好每一碗米線之外，都希望可以回饋社會，推動本地設計及文化產業的教育發展，而今次比賽畀學生們發揮創意思維，其實都寓意譚仔會繼續有創意、努力地發展，繼續成為最受歡迎的米線專門店。

#channelchk #譚仔 #譚仔姐姐 #HKDI #知專 #時裝 #設計 #譚仔姐姐2046未來制服