車Cam再直擊｜Benz衝斑馬線下集
被捕司機視角證據確鑿 網民笑翻：罰多兩條

「Benz直衝斑馬線」事件又有新發展，繼30歲廚師司機被捕後，今日再新車Cam片流出。有人喺facebook一個公開群組「車cam L(香港群組)」開PO，以「平治衝斑馬線事件 平治車cam從第二種角度去看」，同時發放一條相信係涉事Benz的車cam片段，似乎想死撐係因為前線架私家車突然打死火燈停車，擋住了視線，才導致司機cut線抽頭。

片段所見，Benz尾隨前車沿大圍積存街行駛，見前車打咗死火燈，喺斑馬線前停下，Benz隨即抽頭而出，但事實係，佢cut線行駛時，從司機視角明明係見到兩母女從左邊已步出，想過馬路，但司機沒有停低，仍繼續衝前。而他前方仲有一部「死車」停咗喺度，佢之後仲要cut回左線，擺明係危駕中嘅危駕喎！

新車cam片段一出，唔單止得唔到網民圍爐，至今700多個留言一面倒炮轟片段力證司機罪加一等，有人暗寸：「第二種角度，應該是想說明片主只能望到前車，無能力觀察周圍環境...望到前車死火燈自然反應地抽頭，如果真係咁，證明片主不適合揸車。」

亦有網民直言：「見到斑馬線係咪都要收一收慢呢？若果佢真係睇唔清，一抽頭係咪都要睇一睇呢？睇唔清要收慢，普通人都懂這個道理吧？」有人更揶揄：「我諗佢個駕駛執照都係淘返黎嘅！連Benz個車cam都影到有行人在斑馬線上行緊，咁都唔識停，重要畀油行喎」、「樓主識片主嘅話就同佢講聲，依條片千祈唔好交比好人呀！分分鐘判得仲重呀！」

事發於上周六(25日)大圍積存街，一輛Benz抽頭衝過斑馬線，爭啲撞到一對正過馬路嘅母女，司機事後仲聲大夾惡，大鬧喺斑馬線打死火燈讓母女過馬路嘅鄰線司機「玩嘢」。Benz司機事後被警方以危駕罪拘捕。

#車品 #Benz #廚師 #平治 #大圍 #積存街 #城河道 #積富街 #危險駕駛 #斑馬線 #車cam #死火燈

屯門拖頭高速入彎 擺尾橫掃2車
車cam直擊勁驚險 私家車尾爛晒

今晚（22日）6時許，屯門龍富路往皇珠路、近龍逸邨對開的彎位發生交通意外。一架拖頭車以高速入彎，擺尾撞到前面兩架私家車。網民紛紛指摘拖頭車「開咁快仲乜呢」、「最大問題一定係架拖頭」。

亦有網民爭拗白車P牌仔為何不打死火燈，「cam尾架白色H車P牌，都有問題，咁嘅情況下，都唔打死光（火）燈，提示後車」，但遭其他人反駁並非必要，「今次貨櫃超速駕駛，打咩都冇用」、「咁都可以賴人哋唔打死火燈提示？」

#屯門 #龍富路 #皇珠路 #龍逸邨 #撞車 #車禍 #交通意外 #拖頭 #私家車 #P牌 #死火燈 #超速駕駛 #入彎 #擺尾 #長車 #channelchk #車cam