陳茂波拆解已刪支付平台App、取消八達通點拎消費券
聽眾烽煙倡派現金：攞到都無意慾洗錢

新一份《財政預算案》再向18歲或以上香港永久性居民及新來港人士，派發1萬元電子消費券，財政司司長陳茂波今早出席電台聯播節目時，唔少聽眾都對消費券有疑問，又認為「派現金係最好」，其中黎小姐更稱，現時社交距離措施延至4.20，「業界無生意，而且唔知會唔會延長，市民攞到你個消費券，都無意慾去洗錢，好多人都喺垂死邊緣！」

以下係陳茂波回應聽眾及節目主持嘅提問：

1. 消費券係想幫市民，還是幫商戶以提倡經濟？但市民又不能用消費券交水電煤，疫情下唔少商戶須關閉至4月，甚至可能再延長。
陳：第一期消費券主要用以紓緩疫情壓力，諮詢期間有市民表示防疫抗疫都用了唔少錢，「其實呢啲喺消費券內容可以用嘅。」社會上南轅北轍分差好大，部份人受打擊較小，但有些人確實比較困難，所以今輪消費券使用期會「頗長」，「靈活性喺返市民手度，覺得咁樣合適啲」。即使到4月疫情仍未完全遏止，到時仍唔鼓勵大家外出，仲有好多時間在後期使用，市民都可以網上購物。

2. 會否再擴闊使用範圍？
陳：本身範圍已經很廣闊，公共交通工具亦包含在內，主要係政府收費不接受，所以為避免混亂，計劃沿用去年做法，「畢竟大家日常物資、防疫抗疫，日常出行都得。」

3. 第一期要用去年使用嘅電子支付工具平台，唔可以「轉會」，但如果已刪舊平台，又唔記得帳戶號碼同密碼，點算好？
陳：去年個別營運商表現可能確實有所唔同，「個別係要『打手板』嘅，但其他都用得很順利」，稍後會舉行記者會公佈具體處理安排。喺發放第二輪消費券前，政府會審視加入其他支付工具，畀大家有多更選擇，又可以加強平台間競爭力，相信市民亦有得益。

4. 遺失或已取消八達通，改用樂悠卡點算？
陳：推出第一輪消費券前，市民有機會補辦手續，詳情稍後公佈。

5. 第二輪會年中一次過派，抑或分期派？
陳：預計第二輪、暑假發放嘅5,000元都會分期，但詳情稍後公佈，

6. 點解唔派現金？
陳：派現金及消費券嘅分別，係想盡快派到市民手上，重用去年資料可以於4月派出第一期，「用消費券我哋覺得最快」。

#channelchk #消費券 #陳茂波 #財政預算案 #八達通 #支付平台