紅磡怪客食霸王餐 撻朵「山谷邨貓仔」
狂叫侍應老闆「認住我」 多店遭殃

日子難捱，或者唔少香港人都試過節衣縮食，但撻朵食霸王餐，大家就算點經濟不景都唔好學呀～

近日紅磡有位專食霸王餐嘅惡漢出沒，佢早幾日喺一間餐廳食咗個$38嘅麵餐，樓面姐姐好聲好氣同佢講舖頭收6點鐘同請佢埋單，點知佢就撻朵自稱「山谷邨17座貓仔」，叫店員「認住我，知啦嘛吓？」姐姐惟有回應「OK～」「多謝晒～」就繼續忙了。

此時一把相信係老闆嘅男聲好無奈咁答「知啦知啦」，仲叫佢下次記得嚟找返數，但呢位「貓仔」臨走仲要攞彩，反鬧老闆「咁X寸」，仲講多咗幾次「上山谷邨搵我啦～17座呀！」⋯⋯

有街坊話，呢名男子其實有少少神智不清，而附近一帶食肆表示都曾經有類似嘅個案，不過就因為「幾十蚊唔想搞大件事」，所以未有報警處理。

其實睇返資料，香港係冇「山谷邨」，只有「山谷道邨」，而呢條邨喺2002年已經拆咗，部份地皮仲已經變咗香港理工大學嘅學生宿舍。唔知各位住Poly嘅同學仔，其實係咪都可以叫自己做「山谷邨後生仔」呢？

#channelchk #紅磡 #霸王餐 #山谷道邨 #PolyU #香港理工大學 #理大