大偵探又上身！MC疑又蜜會MV女主
網民衫褲帽袋逐個捉：你講一講我覺得幾似Santis

MC可能以為《聖誕很忙》完之後，可以抖抖，點知又有網民爆相，開咗個名為「隔三日連食兩個MV女主角」嘅post。主要靠一張話係上年12月27日喺黃埔一間超市影嘅「MC＆女」圖，就話疑似係《反對無效》MV女主角、熊仔頭YouTube Channel嘅Santis。

呢位眼利網民就將張相由頭驗到落腳，首先話「個高度同啲頭髮都似Santis」，之後又話「Santis有條同相中女差唔多闊嘅牛仔褲」，無論係顏色定係長度。最主要係個棗紅色嘅袋，「個flap位係斜，然後個袋係兩截風琴位」。另外就有人post咗Santis其他相，話佢長期都係用呢個袋。

之前俾人傳同熊仔頭結咗婚嘅Santis而家又捲入另一壇嘢，新年流流都咪話唔攰。不過似乎有啲網民就選擇批評熊仔頭「係典型香男人嘅恥辱」，話佢拍埋啲故仔全部都係「男人要卑躬屈膝，咩都就晒啲女人，當佢哋公主咁樣寵愛，然後結果係自己戴綠帽，又唔＿敢出聲，又唔＿敢爆大鑊，跟住就扮情聖收收埋埋好＿Hurt，又有題材寫故仔啦垃圾」，仲有人話熊仔頭「抵死」添。（雖然由頭到尾都冇承認過係唔係一齊，但係大家都好似當咗係真咁。）

另外，喺MC同Ash事件上面，MC經理人Yee就喺TG Group同MC班Fans討論，仲話Ash前夫「似真白卡」，又有Fans同意，覺得Ash前夫似想博出名，Yee都有覆返話「可能呢一世人得而一次可以有人關注同有人聽佢講嘢，女人嫁咗個咁嘅老公都慘」。

#channelchk #MC張天賦 #Santis #FHProductions #熊仔頭