8號風球 風雨不改
港隊羽毛球代表伍家朗獅子山下求婚成功

呢個喜訊，形容詞一定係：打風唔甩！恭喜港隊羽毛球代表伍家朗，你得咗喇！！10月9日，獅子山襲港，家朗仔向拍拖6年女友Charlotte求婚成功，叻仔！

8號風球下，市面普遍平靜，部份地區橫風橫雨。伍家朗內心更加係好似打緊10號風球咁。要喺半個城市「停擺」狀態下keep going如期進行求婚大計、呃住女友到儀式前一前先開估，家朗世一！

經過一晚平伏心靜，伍家朗今早於社交網公開喜訊：「一齊咗6年半，終於都嚟到呢一日，今次可以話係最成功既surprise。竟然可以呃住你呃到儀式前一刻先開估，更加估唔到係我讀台詞讀到1999你都忍唔住喊咗。」

「8號風球之下staycation求婚真係嚇到一額汗，一早plan定嘅嘢差啲因為個颱風而被破壞晒，好彩有女朋友嘅老死由頭到尾都咁上心，落心落力幫我策劃同籌備，仲有酒店 、花店老闆娘 、場地佈置同攝影師冒住打風嘅危險都幫我繼續將個儀式做到120分，令到女朋友非常之滿意。」

相中見伍家朗一身黑西裝型到無話可說，背地裡都係一額汗，原來套西裝係求婚前一日黑雨下婚紗店人肉速遞去酒店俾佢，令家朗先可以著到咁有型去求婚！成個求婚大project，爭一個都唔得！

伍家朗不時於社交網放閃，感謝女友做其「負能量回收站」。家朗話佢係一個唔鍾意將不快收喺心裡面嘅人，一定要講出口，但當然都唔喜歡放負；但每遇上難以處理嘅問題，第一個就諗起女友，形容對方係佢最信任嘅人，而且心靈相通程度係佢好多時講到一半女友已知佢想講乜嘢：「即使成日向佢抱怨，佢都會耐心聆聽並給我意見。」家朗好感激女友一直陪伴，即使佢經常要培訓同去外地比賽，女友亦會體諒同支持他。

恭喜晒準伍生伍太！

圖片來源：伍家朗IG

#伍家朗 #求婚 #獅子山 #8號風球 #staycation #羽先球代表 #channelchk


編按：各位大大，小編C開心得滯發雞盲，主圖打錯咗「求婚求功」，對唔住家朗同各位大大🙇‍♀️🙇‍♀️