直擊恐怖港鐵甩門墮軌！鬆路綫板停銅鑼灣站
港島綫灣仔至鰂魚涌癱瘓3小時 撞正放工

細個時搭港鐵，阿媽都會叫唔好挨住車門，因為恐怖嘅事會隨時發生！阿媽今次真係無講錯，因為港鐵啱啱繁忙時間，港島綫列車成隻車門飛咗出嚟，直墮路軌旁；車門上面嘅路綫板仲跌咗落嚟！港島綫列車服務由傍晚約6時開始受阻，來往灣仔至鰂魚涌站暫停服務約3小時！

網上流傳嘅片段顯示，今日傍晚約6時，一列已停喺銅鑼灣站月台往堅尼地城方向月台嘅列車，靠近廣告一邊車身嘅一道車門脫落，路綫板亦甩咗落嚟；帖文形容係「整道門飛脫」。

港鐵當時話，由於有列車喺銅鑼灣站附近出現設備故障，港島綫列車服務受阻，來往灣仔至鰂魚涌站服務暫停；來往堅尼地城至灣仔站及太古站至柴灣站每4分鐘一班車。港鐵安排免費接駁巴士行駛受影響路段。至晚上近9時，甩門列車才移離主行車軌，港島綫服務始逐步回復正常。

警方話，傍晚近6時接獲有人報案，銅鑼灣站有列車車門故障，當時無接獲有人受傷。

港鐵喺晚上約9點交代事件，初步推測係因為有隧道廣告牌部件移位，與列車車門產生碰撞，先會導致「甩門」，而事件中無任何乘客受傷。

#channelchk #港鐵 #港島綫 #故障 #繁忙時間 #MTR #甩門 #銅鑼灣