譚詠麟偷食粉絲有前科 紅顏知己誕私生子
曾認「一己私欲」享齊人之福

71歲歌手譚詠麟（校長）被爆「睡粉」後，唔少網民都重提校長嘅舊情史，話佢早有前科。當年校長與女友結婚十多年後，兩人關係先正式公開，但校長之前已偷食女歌迷朱詠婷（Wendy），盡享齊人之福。Wendy更誕下私生子譚曉風，至2006年譚父譚江柏過身，校長終公開承認Wendy同譚曉風身份。

有指譚詠麟當年對妻子楊潔薇（莎莉）一見鍾情展開追求，兩人感情穩定，到1981年喺美國拉斯維加斯註冊結婚，但一直無公開。直至1993年，莎莉父親過身，訃聞上寫有譚詠麟名字，兩人婚姻關係才算半公開。二人婚後未育有子女，有傳作為獨子嘅校長因而有傳宗接代壓力。

而早喺1991年，譚詠麟喺歌迷會上已邂逅細佢22歲嘅Wendy，佢哋發展成紅顏知己，Wendy喺1995年更願意無名份為校長誕下譚曉風。到2006年，譚父譚江柏過身，訃聞有Wendy同譚曉風嘅名字之外，兩母子亦有出席喪禮。校長接受電台節目訪問時曾承認，自己為「留個後代」和「一己私欲」導致事情發展到咁地步，對「背後兩個女人」致歉，又叫大家唔好學他。

之後，校長、Wendy同譚曉風經常「一家三口」出現。當時有報道指，莎莉心淡看破紅塵，甚至傳出削髮為尼。到2001年，校長喺61歲壽宴上，公開同Wendy出席，似係有意將佢「扶正」。幾年前譚曉風喺英國牛津大學取得碩士學位，校長更豪擲百萬，同親友參加囝囝畢業禮。

#channelchk #譚詠麟 #一夫兩妻 #偷食 #睡粉 #Wendy #譚曉風