三哥全新螺酸湯米線夠提神 強尼：好多人會搶住買畀姜濤

呢排風打唔成，假無得放都算啦，天氣仲要又熱又笠，真係人都癲⋯⋯好彩有米線界暖男三哥出新嘢打救Channel絲啫～🤗

三哥喺呢個鬱悶嘅九月為大家帶嚟「螺酸湯米線配海螺片及麻辣豬皮」，入面除咗有用古法醃製嘅爽脆酸筍同酸辣豆角，仲有嚟自深海嘅海螺切片，夾埋索晒汁但仍然爽滑嘅豬皮，真係夠哂開胃，越食越上癮呀！三哥仲錫住大家嘅荷包，咁多料都只係盛惠$43咋！Channel絲淨係見到碗米線已經Feel到神奇海螺嘅魔力啦！🐚

淨係食米線唔夠喉，不如再整多碟小食啦！之前鍾意食煳麻湯魚爽肚米線嘅三粉要留意了，新出嘅呢款「椒麻涼拌魚爽肚」一定啱晒你口味，今次嘅涼拌整法加埋三哥秘製嘅椒麻汁同手拍青瓜，令塊魚爽肚爽上加爽，爽到Channel絲就快覺得個爽字唔係咁寫添😋

人人都想食辣，唔通個個都食到辣咩？貼心嘅三哥仲出咗呢杯「鳳梨藍蝶花香梳打」幫你唞啖氣，望吓藍蝶花嘅夢幻顏色，再啜啖充滿鳳梨果茸同青檸汁嘅梳打，真係又清甜又解膩，完全係外在與內涵都並存嘅Perfect Match呀！😍

三哥今次仲請嚟幾位忠心三粉嚟試食，包括港隊羽毛球代表 Ng Ka Long 伍家朗 、滑冰女神 Maisy Ma 馬曉晴 同 ViuTV台柱「全能強尼 」 。伍家朗話平時喺舖頭食開10小辣，事關佢一食辣就流晒汗有啲尷尬，如果喺屋企準備好冷氣、毛巾，就可以挑戰5小辣。馬曉晴話細個喺北京住嘅時候特別鍾意食麻辣，但後來去美國生活就無以前咁食得辣，而家都只可以食到麻辣10小辣，最鍾意加竹笙、魚片，同埋嗌幾款小食同朋友一齊開心share，覺得好溫馨。強尼就話自己可以食到「多過小辣」嘅程度，鍾意返屋企食辣食到滿頭大汗，覺得好爽！

對於今日姜濤出席活動時暈倒，馬曉晴話喺IG都見相關報道，覺得好心痛，知道姜濤工作繁忙，希望佢可以有休息時間。問到強尼會唔會買碗三哥米線畀姜濤食，強尼就話知道佢鍾意食，但相信好多人會搶住買畀佢，又話呢兩日姜濤最需要休息，「食下屋企飯、瞓下覺，兩日後就會見到容光煥發嘅姜濤再出現！」

#譚仔三哥 #鳳梨藍蝶花香梳打 #螺酸湯米線配海螺片及麻辣豬皮 #椒麻涼拌魚爽肚 #伍家朗 #馬曉晴 #強尼 #姜濤