梅艷芳88年音樂特輯 重現利舞臺身影
從小想做律師 15歲幾乎嫁人

梁樂民執導傳記式電影《梅艷芳》，王丹妮重演梅姐精采一生，熟悉的故事情節，令人唏噓。戲中大量CG後製，重現80年代黃金時代的香港，包括已拆卸的利舞臺、面目全非的彌敦道及尖東海傍，更令人動容。冰冷的電腦器材，喚回80年代的溫度。

電影下月12日公映，有關影片後製的特輯可按此欣賞： https://bit.ly/3nf81So 。梅姐最錫的歌迷最近在其fb專頁分享了一條88年梅姐的音樂特輯《梅艷芳之夢裡風情》節錄部份（ https://bit.ly/2Zlgv2o　），片長逾6分鐘，由荔園、利舞臺、清水灣電視城，梅姐穿梭其間，細聲傾訴。惟33年後已人面全非。

荔園是七、八十後小朋友的樂園，但對童年的梅姐而言，唯一陪著她一起成長的是遊樂場裡的歌廳：「我四五歲就出嚟唱歌，好多嘢都未曾試過。」

梅姐又自爆小時有個花名，叫做「鐵嘴雞」，因為乜都要拗。家姐梅愛芳也服了她：「佢細個幫我哋班兄弟姊妹，成日同媽咪拗頸。」「鐵嘴雞」的少女心事，其實想做律師。

除了做律師，梅姐很早已夢想有自己的家庭。十五、六歲那年，她認識了一個很喜歡的男孩子，「感情好到談婚論嫁，嗰陣真係有衝動結婚。如果我當年選擇咗結婚，咁而家你見到嘅應該唔係梅艷芳，可能係一個湊仔婆。」

短片最後一幕於利舞臺取景，也是梅姐18歲參加第一屆新秀摘冠的地方。電影《梅艷芳》用CG搭出利舞臺附近整條街道，惟該區可供參考的俯瞰影像不多，只能用幻想和創作填補空白；惟在這音樂特輯中，88年的梅姐，和當年還未拆卸的利舞臺，活生生就在眼前。

利舞臺1927年開幕，91年8月18日正式謝幕，臨別前無綫舉行了一場告別騷，梅姐在台下時，凝神打量四周，盡力記住眼前一切：「我係第一次喺咁多人面前參加比賽，第一次攞到咁多掌聲歡呼聲，呢個舞台對我好緊要。我面試嘅時候都係喺利舞臺，好多好多回憶。

「我每次返唱片公司，就會入嚟睇免費戲。出面有幾個阿伯對我好好、好錫我，所以我嚟到呢度，就似返到屋企咁樣。我好想保留呢個地方，我諗每一個香港人，你哋都希望可以再嚟睇戲，或者欣賞呢個地方，不過冇辦法，一定要拆，因為撻地太值錢。

「所以我希望搵一個地方，可以將個舞台保留番，得唔得呢？」梅姐問。

#梅艷芳 #梅姐 #利舞台 #利舞臺 #夢裡風情 #王丹妮 #梁樂民 #荔園 #channelchk