TVB投訴民間電視大獎侵權 方以文多Post被刪
《東張西望》卻擅自駁片拎嚟賣廣告 疑雙重標準？

早前電視評論家方以文舉辦「觀眾在民間電視大獎」，網民可以投選心儀嘅節目同埋演員，電視台就包括TVB、ViuTV、開電視及港台，而啱啱呢一屆就有超過60,000名網民投票，千祈唔好以為呢一個大獎係ViuTV圍爐大賽，其實啱啱呢一年，李佳芯都有拎到民選視后。

早排方以文就喺IG限時動態話，Facebook有幾個民間電視大獎嘅貼文都被TVB投訴侵權，連買Instagram幾個post都冇埋，懷疑係因為當中嘅相包含TVB嘅角色造型照。

投訴人哋侵權，但另一邊廂，《東張西望》上年11月冇問過當事人之下，剪咗前無綫、商台主持陳慧儀同趙汝威博士喺Facebook、討論「浸稀釋漂白水改善濕疹」嘅直播，夾埋其他片拎嚟做植入式廣告。

嗰集嘅《東張西望》，拎咗陳慧儀嘅直播片段做引子，之後就訪問位元堂嘅中醫師，搵咗一個媽咪訪問佢幫仔仔對抗濕疹嘅方法。片段入面，呢位媽媽就喺小朋友濕疹嘅位置搽油膏（睇包裝似係卡倫萬用膏），之後小朋友就話冇以前咁痕。點解係植入式廣告？因為出咗位元堂logo，片尾都有顯示贊助。卡倫萬用膏就冇出到logo，但係TVB旗下嘅網購平台「士多」就sell卡倫萬用膏，卡倫萬用膏都係TVB嘅長期廣告商，所以話係植入式廣告一啲都唔出奇。

TVB係冇問過陳慧儀嘅情況下用咗佢條直播片，令到好多觀眾誤會，甚至有好多網民事後向佢哋查詢有關嘅廣告產品⋯⋯陳慧儀都希望網民可以幫手澄清返，佢自己同卡倫萬用膏係冇任何關係，都唔清楚相關產品嘅成份同埋真正來源。

圖片來源：陳慧儀YouTube、TVB、方以文IG、思思TVB的二三事IG

#channelchk #TVB #觀眾在民間電視大獎 #方以文 #東張西望 #陳慧儀 #侵權