杜氏夫婦搬家事上電視賀喱騷台慶
12.20記得睇《杜氏閒情》同台慶頒獎禮

講你都唔信，「 喱騷」話咁快就一周年台慶啦！！整咗咁多精彩節目，緊係搞返個台慶頒獎禮賀賀佢啦～ 杜汶澤嗰晚仲化身豬肉切割員，以「閉門式分豬肉」為主題，頒咗三個足金獎座，表揚頭三個全年最高點擊率節目。如果想睇足本台慶頒獎禮，20號喺喱騷社交平台就有得睇啦！

點擊率第三名係哩騷首部自家製劇集《在觀塘下體現愛的故事》，監製田蕊妮喺台上分享得獎感言，未知是否興奮過度，阿田在台上竟然甩轆「講錯嘢」，明明排第三，又話話「很開心獲得第二位」，唔緊要啦，無拎錯人哋個獎咪OK囉～而首次執導劇集嘅導演林子穎，就多謝阿田給予機會，「多謝台前幕後的用心，希望可以拍第二季。」

至於全年最高點擊率節目第二位，則由口碑極佳的《墨水漂流》奪得，仲邀請到身上紋身堪稱全球最多的「外國人」頒畀兩位紋身師Jimmy同Cody，果然落重本啊！眾望所歸，第一位由杜汶澤和李拾壹主持的《尋找他媽的故事》勇奪，大會仲特登請埋重量級嘉賓、電視界史上最偉大巨人153嚟頒獎，不過牛高馬大嘅阿澤就要用放大鏡輔助先可以喺153手中拎個奬座。阿澤仲不畏言咁講，「其實當初拍這個節目的目的，是可以周圍呃飲呃食，希望大家可以繼續課金支持喱騷。」

第一年台慶就咁精彩，2022年又點輸得呀～台慶鉅獻清談節目《杜氏閒情》，將會喺12月20日隆重首播，係阿澤同田蕊妮兩公婆結婚15年首次合體拍節目呀！今次兩公婆為咗《杜氏閒情》首度合體，將「家事」搬上電視，除咗喺螢幕面前打情罵俏，互揭對方家中真面目，亦都會解答網民生活上疑難雜症，李拾壹更會在節目中做和事佬（aka架兩），諗起都覺得有趣～

閱讀全文：
https://www.facebook.com/channelchk/photos/a.104190038612254/155296590168265

#channelchk #喱騷 #杜汶澤 #田蕊妮 #在觀塘下體現愛的故事 #墨水漂流 #尋找他媽的故事