IANSON親挑2義工一齊搭直升機遊港
即睇點先有機會與老闆共處（附報名連結）

做義工唔只有意義，仲有機會同Ian陳卓賢、Anson Kong江熚生@ＭIRROR一齊坐直升機遊香港。不過到時幸運兒都可能掛住望住兩位「老闆」，多過欣賞風景啦！

MIRROR向來正能量滿滿，今次就答謝同樣愛助人嘅義工。服裝品牌PORTS為慶祝60周年，將會舉行將於香港舉辦「PORTS X Time Auction 直升機之旅」，邀請兩位義工喺10月20日同Ian、Anson Kong一齊坐直升機，遊覽香港景色；全程為15分鐘。

想報名嘅義工可以喺網上報名（連結： https://bit.ly/2Y1iDLu ），但機會當然唔係人人有份。報名人士必須喺10月6日前的一年間，喺註冊慈善機構擔任義工滿60小時以上，同埋分享MIRROR同義工活動點樣為個人生活帶來正面影響，寫得最感動嘅義工就有機會俾Ian同Anson Kong親自挑選出嚟一齊搭直升機。報名截止日期為10月6日，幸運兒將於10月13日收到電郵通知。

有關活動消息已經喺fans club廣傳，連AK本尊都有讚好。唔少「生粉」、「Hellosss」都激讚有意義，跟IANSON嘅大愛性格好配合，亦認為義工值得有回報，但就建議兩位幸運兒粉絲帶定氧氣筒，「要有埋急救醫護，因為兩個幸運兒對住Ianson，極大可能會出現心跳加速、血壓飆升、暈眩眼花、呼吸困難嘅情況」，另有fans講笑話「嗰兩位幸運兒應該响架直升機上邊暈低咗喇」。

#channelchk #IANSON #陳卓賢 #江熚生 #AK #AnsonKong #Ian #MIRROR #PORTS #PORTS1961 #義工 #正能量 #直升機之旅 #viutv

Anson Kong10.16牛一
自家品牌KYUBI同日誕生做老闆

Happy Birthday to me！Happy Birthday to KYUBI！

作為Mirror頭腦擔當（句句都押韻純屬巧合），Anson Kong江熚生有重要事要宣佈——聽日生日，自家品牌日系街頭服KYUBI同日誕生！佢做老闆喇！

AK今午於社交網正式宣佈：「今年終於完成宏願之一、親手育成一個自家品牌誕生，正式成為江！老！闆！」#KYUBI （キュウビ, 九尾）係咩呢？AK嘅解釋係：象徵圓夢及保護，仲有口號：「保持初心 堅守夢想 型住努力 潮住成功」，巧型！

根據由KFC成員開嘅「ak_dictionary」介紹，KYUBI，「亦為kyuubi，是有九條尾巴的妖怪狐狸。九尾狐在多國傳說中均有記載，日本動漫《火影忍者》中主角渦卷鳴門體內就封忍著九尾的卓羅。」

「Kyubi玖」官網 ( https://www.mmxxonline.com/ )多張AK做model嘅大圖，"Have a young heart"（保持初心）。老闆穿戴自家品牌產品，由Mirror成員最愛嘅漁夫帽、到AK成日著嘅hoodie，以至毛巾、遮都有得賣。明日開售，大約1月發貨。

唔記得講番，老闆呢個生日，係佢最後一個二字頭生日。佢哋之前玩「全民造星1問答大會」（ https://bit.ly/3lGaJRl ），同Tiger仔合稱「30歲以下群組」，做MC嘅皮皮Frankie一聽到個名就話：「好針對性喎你呢個…」就連Lokman都唔幫佢：「全民造星么潤第一屆！」老闆呀，出年你都30喇……

好期待有日IANSON各自著住個人brand拍新片呀！預祝老闆生日快樂！Kyubi玖生意興隆！

有用資訊：AK正式做老闆之前，已經有個朵叫「老闆」，何解？因為KFC成立之初，生粉各司其職，有人負責設計、有人負責剪片，分工合作；頭腦擔當AK就幫生粉們「分部門」 ，有設計部、IT部，人材濟濟；AK亦因為咁，多咗個身份，就係「老闆」喇。

#AK生日 #Mirror #老闆 #老闆生日 #IANSON #Kyubi玖 #火影忍者 #channelchk