巴斯光年個人電影《光年正傳》預告出爐
網民齊齊錯重點：一直以為巴斯光頭 勁想鄧梓峰配音

「太空戰士，一飛沖天！」每次睇《反斗奇兵》（Toy Story）見到巴斯光年都會諗起呢句對白。嚟緊巴斯仲會擔正，講緊嘅係迪士尼同彼思動畫（Pixar）合作嘅獨立電影《Lightyear》（港譯《光年正傳》），噚日Pixar就上載咗分半鐘嘅預告片，已經令人好期待，但電影預計要明年6月先喺美國上映，大家仲要等下先喇！

《反斗奇兵》入面嘅巴斯係玩具太空人，而《光年正傳》就會圍繞巴斯嘅原型人物製作，講述佢由試飛員成為太空戰士嘅故事。電影英文版會由「美國隊長」演員基斯伊雲斯（Chris Evans）聲演。不過似乎呢個都已經唔係重點，因為預告片一出之後，唔少網民都話原來巴斯有頭髮，「一直以為巴斯光年是個光頭」，仲話「唔慣見到佢有頭髮」，仲有人提議可以搵鄧梓峰配音添。

#channelchk #迪士尼 #彼思 #Pixar #光年正傳 #Lightyear #巴斯 #反斗奇兵