突取消婚宴
荃灣西如心酒店宴會廳無食肆牌 銅鑼灣南灣如心都冇！

聲稱係香港最大型宴會廳之一，可「為這一天留下畢生難忘的回憶」、佔地超過1.8萬呎嘅荃灣西如心酒店Nina ballroom，天花場景燈仲有8款俾你揀，可惜冇食肆牌，得公眾娛樂場所牌。逾50名已預訂Nina Ballroom擺酒嘅新人近日收到酒店通知，話「未能提供宴會服務」，需即時取消預約，最快明年3月後再排期。

有即將行禮嘅苦主話，酒店最初聲稱可4人一枱代替3分2賓客打針，咁就可以擺到15圍，點知本月11號突接獲酒店通知，話因為「技術性問題」，須取消婚宴。荃灣西如心酒店回覆傳媒查詢時話，宴會廳暫停營運至另行通知，未有交代原因。

中伏嘅新人而家頭都大埋。有新人下月擺酒，怒道：「真係除咗講X你老X，真係唔知講咩好。另有都係訂咗Nina ballroom嘅新人表示，佢係12月尾擺酒，上周sales突然話場地問題取消，「可以安排銅鑼灣如心酒店」。翻查資料，銅鑼灣如心酒店有提供天際宴會廳同6樓多功能廳，前者得650呎、最多可以坐40人；多功能廳得500呎，最多坐57人。

明明訂萬八呎ballroom，突然變500呎conference room，苦主表示：「我哋已經睇咗個場，超細同埋場地好舊，最多客納40、50人，仲有分兩層。」

根據《食物業規例》，出售膳食或非瓶裝的飲品供進食或飲用的處所都需申領食環署牌照。除荃灣西同銅鑼灣外，九龍東如心酒店都有2個婚宴場地，分別係120宴會廳及220宴會廳。但翻查食環署網站，九龍東嗰間得2樓forte持食肆牌，食自助餐嘅；120宴會廳及220宴會廳則未有顯示。

銅鑼灣嗰間得有1間持牌食肆，喺酒店地庫。南灣如心酒店婚宴場地P6宴會廳，亦未有列入食環署持牌食肆名單內，而該酒店目前為隔離酒店。
而今次被投訴的荃灣西如心酒店有3間餐廳屬持牌食肆，包括9樓Café Circles、41樓可舉行婚宴嘅Sky Lounge，及7樓嘅「如」。

Channel絲曾以準新人身份聯絡銅鑼灣如心酒店，為何天際宴會廳及多功能廳未有顯示持牌食肆名單內，酒店宴會部職員最初表示「冇問題」，因為場地屬私人宴會廳，並指「銅鑼灣唔同荃灣（如心酒店）」，但再追問下婚宴場地的餐飲安排時，職員則表示詳細要再向上級了解。

#channelchk #如心 #荃灣如心 #擺酒 #結婚 #結婚場地 #NinaBallroom #宴會廳