大嶼山官地搜獲39艘疑走私快艇 8個大馬力引擎
海關：料已停泊一段時間

走私猖獗，為打擊另類「海上物流」，海關、警方及地政總署由9月30日至今日（6日），在大嶼山多個走私黑點展開聯合行動，打擊海上走私活動。聯合行動中，在東涌牛凹村共檢獲39艘懷疑非法改裝或建造嘅快艇，同埋8個全新大馬力舷外引擎，市值約1,300萬元。最離譜嘅係，走私分子係佔用官地，擺放、維修同改裝快艇，以逃避警方「法眼」。真係越危險嘅地方越安全咩？

水警西分區助理指揮官（行動）劉家業記者會上表示，今次行動由9月28日開始，配合陸上警方、海關、海事處及政府飛行服務隊，並發現不法之徒將一批快艇匿藏於紅樹林，水警遂於本月4日下晝聯同海關及地政總署聯合行動，於牛凹村發現39艘快艇非法佔用政府官地，現場未搜獲任何走私物品。

海關有組織罪案調查科特別調查課監督李艷萍指，走私分子利用大嶼山作走私地，將快艇停泊於較偏僻嘅官地，進行維修及改裝，涉觸犯香港法例第28章《土地（雜項條文）條例》 。

39艘快艇曬鹹魚咁攤晒喺官方都冇人知？地政總署離島地政處總地政主任袁仕俊即被問及地政人員是否巡查不力，袁只表示：「離島地政署就離島區各個政府土地進行巡查，我哋會配合執法部門進一步商討加強巡查。」記者追問係咪巡查不足？佢就話：「呢個我手頭資料未睇…即係…呢一刻未提供到上一次幾時巡查。」

袁Sir又話：「我哋一路都配合番相關執法部門，打擊相關罪行，至於呢個地方佔用咗政府土地幾耐呢，其實我哋同事都調查中嘅。」咁佔用嘅面積又有幾大呢？「我手頭仲喺度調查同計算中。」

記者惟有問番Madam Lee知唔知呢個非法佔用官地嘅「私家碼頭」究竟運作咗幾耐啦，Madam話：「呢度係冇任何監管到嘅土地，當然即係政府土地啦，但人煙稀疏，所以我哋而家會追查番。如果呢啲快艇係有登記嘅，會追查番船主。」Madam又話，相信呢批快艇已經佔用官地「一段時間」。問題又嚟喇，咁地政究竟幾耐冇巡查呢？係咪都有「一段時間」？

劉家業就指，現場位置相當隱蔽，「唔排除呢度嘅快艇可能由陸路或者其他方法嚟到呢度。我哋嘅行動仍然進行中。我哋嘅行動仍然進行中。」但細節不便透露。記者再問係咪水路已經block咗、令快艇要由陸路入嚟？劉Sir就話：「我哋唔排除呢個可能性。」仲話唔排除當中有三合會參與。

#大巑山 #走私 #地政 #海關 #水警 #聯合行動 #大馬力摩行 #channelchk