林鄭右手肘骨折 打石膏自行出院：多謝關心
傳禮賓府樓梯跌倒 漏夜自行入瑪麗

傳媒引述消息，指特首林鄭月娥昨晚（18日）在禮賓府樓梯跌倒。特首辦指，林鄭漏夜自行前往瑪麗醫院，證實右手手肘輕微骨折，按醫生建議留院觀察，並暫時休假，由政務司司長李家超署理特首職務。原定今早召開的行政會議休會，會前見記者環節亦取消。

林鄭留醫1晚後，今早9時許穿上粉紅外套出院，其右手疑打上石膏，包紮後戴上手托。她向鏡頭揮手和點頭，並稱「多謝關心」，自行步上七人車，返回禮賓府。公務員事務局局長聶德權指，未知道待首休假至何時，著記者向特首辦查詢。

#channelchk #CarrieLam #林鄭 #林鄭月娥 #跌倒 #骨折 #手肘 #瑪麗醫院 #打石膏 #禮賓府

素顏白衫林鄭自拍 稱宴客落樓梯跌崩肘骨
料2周癒合 嘆難穿衣寫字 感謝收大量問候

特首林鄭月娥噚晚喺禮賓府仆倒，搞到右手手肘輕微骨折，仲喺瑪麗醫院留醫咗成晚。唔知大家有無遠遠地喺心入面問候佢呢？今朝披住桃紅色外套出院嘅林鄭，彷彿聽到大家對佢嘅關心，所以好快就喺社交網站上面報平安，仲附上素顏白衫原汁原味打石膏自拍一張。

網民對林鄭跌倒嘅過程有好多推測，林鄭喺po度都有解釋到㗎：「事緣昨晚在禮賓府宴請退休同事，晚宴開始前下樓時從梯級跌了下來，初時以為是皮外傷，但右手愈來愈痛，於是送客後便自行到瑪麗醫院求診。」林鄭喺檢查同照完X光之後，發現右手手肘骨有部份「崩」咗，所以即刻打石膏固定，相信都打返要兩、三個禮拜。

香港人有幾熱情，大家噚晚應該見識到。林鄭指，佢收到大量嘅問候訊息，未能夠一一回覆致謝，仲話有多位好友留言「小病是福」，今次終於可以畀佢「唞吓」。佢仲強調自己接近3年無放過假：「充電後再帶領香港迎難而上，落實今年《施政報告》的多項措施。」

林鄭曾經自稱「好打得」，但今次仆一仆，連佢都忍唔住大嘆：「不過，現在最大的難題恐怕是穿衣和寫字啊！」Channel絲隨即諗到佢要面對首個難題：最近天氣涼咗咁多，到底佢點樣着多幾件衫保暖呢？

#channelchk #CarrieLam #林鄭 #林鄭月娥 #跌倒 #骨折 #手肘 #瑪麗醫院 #打石膏 #禮賓府