IKEA狗公仔披長黑髮扮《鋼鍊》合成獸
hashtag「克服童年陰影」 網民反應兩極

今日萬聖節，唔少人都會打扮成動漫或電影嘅恐怖角色應節，向來抽水力強嘅IKEA宜家家居都唔例外，為產品金毛尋回犬毛公仔戴上黑色長假髮，扮演動漫《鋼之鍊金術師》中最為人熟悉、由小女孩及寵物狗煉成「合成獸」嘅一幕，重提返呢件動漫界「說好不提」嘅事。帖文hashtag咗「克服童年陰影」，不過，唔少網民都留言話「直達地獄啦」、「過咗咁多年，而家見到都依然會唔開心」。

IKEA宜家家居凌晨喺facebook專頁出post，上載咗張金毛尋回犬毛公仔GOSIG GOLDEN戴上黑色長假髮，扮演動漫《鋼之鍊金術師》中，小女孩妮娜與寵物狗亞歷山大被爸爸修塔卡煉成合成獸一幕。而且相中以黑色做背景，用燈光打落金毛尋回犬毛公仔頭部，又配上「大……哥哥……萬聖節快樂」嘅caption，令呢隻戴咗黑色長髮嘅狗顯得更加陰森恐怖。

帖文又寫咗「大哥哥⋯今個⋯萬聖節⋯來IKEA⋯陪我玩吧⋯」，呼應《鋼鍊》入面合成獸講「大哥哥，陪我玩」嘅對白。IKEA仲介紹佢係「IKEA⋯嘅⋯GOSIG GOLDEN⋯合成獸」，並hashtag「克服童年陰影」。

帖文隨後引起大批網民留言，唔少睇過《鋼鍊》嘅動漫迷都話「說好不提」、「這個是禁忌啊」、「小編同獸父一樣喪心病狂」┌「每次諗起果嗰個畫面都好心嗡㗎」。但亦有網民覺得好啱萬聖節氣氛，「萬聖節就係要呢啲」、「其實萬聖節攪下gimmick, 有咩所謂……有創意」、「唔講以為係真人真事」，亦有網民表示唔明點解有人會發火，「講說好不提係standard，但有啲人真動氣話公關災難，我個人覺得幾過癮啊！」

#channelchk #萬聖節 #Halloween #哈佬喂 #宜家家居 #IKEA #合成獸 #鋼之鍊金術師 #鋼鍊 #說好不提 #直達地獄 #大哥哥陪我玩