鏡仔定虎仔？TVB推男團Super Tiger力撼MIRROR？
跳唱初演咪嘴 舞唔齊 人人照拍手惟曾志偉冇表情

TVB上年推完女團After Class之後，唔知係咪因為趁虎年，就推多隊「Super Tiger」，仲要喺賀歲節目《恭喜發財好運來》入面初演。

呢隊Super Tiger有10位成員，包括羅天宇、許俊豪（Lincoln）、丘梓謙、鄒兆霆、曾展望（GM）、林俊其、魏柏豪、劉展霆（Eden）、李紹堅、宋懿芳。

佢哋今次就未有原創歌，所以就跳唱中國節目《青春有你》嘅主題曲《青春有你》同埋大家新年聽到厭嘅《喜氣洋洋》。

不過原來收通告到「出道」淨係得一個星期時間，咁唔怪得之10位嘅舞步都唔係好一致啦。噢，好似仲要係咪嘴嘅。

「Super Tiger」表演嗰陣，台下嘅高層／藝人都有畀面拍手，不過「Super！」始祖曾志偉就好似冇咩表情，仲係咁拎轉頭同樂易玲講嘢，仲要手指指，似乎就係幫逐個Super Tiger成員評下分。

對於TVB推完女團推男團，網上討論區嘅網民反應都可以話係一面倒：「又係老土名」、「唔用五虎咪用tiger做名囉」、「仍獲網民高度讚賞？where？」有人就問「今年係虎年我明，但係點解要super？」，一位看透大台理論嘅網民就回佢「總之加Super就勁，加青春就係追到後生潮流」。

依家有得揀喇，咁你追鏡仔定追虎仔？唔使咁急揀嘅，不過Channel絲腦海入面，汪明荃嘅「虎」字仲係揮之不去，好想嗌返聲：Super虎！

#channelchk #TVB #SuperTiger #羅天宇 #許俊豪 #丘梓謙 #鄒兆霆 #曾展望 #林俊其 #魏柏豪 #劉展霆 #李紹堅 #宋懿芳