壽司郎驚現假飛？！分店列明真假三大特徵

為咗食壽司郎 ，你可以去到幾盡？排三個鐘？搵屋企人去排？跨區去少人排啲嗰間？以上答案都好正路，正當Channel絲以為最離譜嘅係買「黃牛飛」打尖，有人竟然出到印假飛呢招⋯⋯

有網民去完藍田壽司郎之後，喺「香港壽司刺身關注組」影咗張相出Post，仲話「而家變態到連壽司郎啲飛都可以做假」。張相影住接待處附近嘅一張A4紙，相信係鋪頭特登列印嚟提醒員工假飛特徵。張紙上面除咗有大埔店真飛同假飛嘅相，仲列明兩者之間嘅分別，例如「字體不一」（假嘅類似新細明體）、「紙質懷疑唔是熱感紙」，同埋「只限實體票、其他方式無效」呢句，假飛嘅「、」，會變成「，」。

張相一出，好多壽司郎Fans都「當堂嚇一跳，然後得啖笑」，話其實只要喺現場親身拎飛，就唔會拎到假飛，仲話估唔到有人「食個壽司都要犯虛假文書」。好奇嘅Channel絲上網睇吓仲有冇壽司郎嘅「黃牛飛」賣，發現雖然壽司郎早前已經講明「網上轉售walk-in籌號不能使用」，但仍然有人將個籌號遮住一個數字，繼續賣畀人⋯⋯仲有啲係符合上面假飛特徵嘅添。其實真飛假飛，同好多騙案一樣，一開始唔貪小便宜就唔會畀人呃，想食就乖乖地排隊啦！

#channelchk #sushiro #壽司郎 #黃牛飛 #等位 #排隊 #藍田 #大埔