《造星IV》A1組「狼人殺」勁舞震懾全場
今晚壓軸對決分勝負

《全民造星IV》第三回合最後一輪A1同B2組嘅指定項目對決今晚（7日）就會播出，而家A、B兩組贏出局數暫時係2比2，即係今晚輸咗嗰組將要淘汰多5名成員。睇返呢兩個小組噚晚（6日）自選項目比賽，A1組嘅「狼人殺」深得評判讚賞，後台嘅花姐都話佢哋係佢心目中嘅Top 5。

A1組嘅Marf、CK、Win Win同So Ching本身都係跳舞擔當，佢哋自選項目「天黑請閉眼」以「狼人殺」為主題，各人扮演入面唔同角色之餘，每角色又配合唔同嘅跳舞風格，睇到連冇玩過狼人殺嘅評判陳詠燊都讚：「你大鑊啦，我唔識玩『狼人殺』，我唔明做咩嘅，但我竟然都覺得幾好睇。」本身鍾意玩「狼人殺」卓韻芝就話感受到佢哋嘅力量，好有節奏感；Kary都讚睇到佢哋有女團有嘅嘢。

至於B2組嘅Gao、Alice同Mic，佢哋自選項目係「Please don't jump！」，以百老匯歌舞形式跳唱《天台飛人》，但可惜評判唔太欣賞，Kary更批評佢哋3人唱歌唔合格。呢兩組今晚會演出指定項目《救命歌》嚟分勝負，如果B2組輸咗，已列「死亡名單」嘅Mic就會被foul；至於A1組噚晚就未公佈，只係見導師許廷鏗曾拎住大熱門Marf嘅參賽資料，後尾又提過考慮CK定So Ching，不過呢組個個都跳得好好睇，真心難揀呀！但除咗細組已列入死亡名單成員被淘汰之外，所屬大組亦都要淘汰多5位成員。

至於再前一輪比賽，即係A3組同B5組對決。B5組演唱指定歌曲《浸浴》，睇到評判都拍晒手掌，阿芝讚佢哋4個之間嘅互動令表演更好睇；Kary亦讚睇到佢哋嘅默契。最後5位評判一致投B5組勝出，A3組被列入「死亡名單」嘅筠兒冇得留低。

#channelchk #全民造星IV #女團 #狼人殺 #天黑請閉眼 #Marf #CK #WinWin #SoChing #Gao #Alice #mic