港日混血莎莎辣舞贏醫科生 率先晉級
曾為家燕姐旗下女團成員 喜感十足

ViuTV 選秀真人屬《全民造星IV》噚晚（1日）首播，今次比賽會有全新賽制，首輪先由兩位參賽者進行1對1淘汰賽。曾被花姐（黃慧君）點名睇好嘅港日混血兒莎莎（坂部佩莎）就大跳誘人熱舞，先拔頭籌獲得評判青睞，率先晉級60強。節目亦播出參賽者面試片段，其中𡃁模出身嘅黃榕就帶咗自己本性感寫真去面試，結果俾負責面試嘅梁祖堯批評：「我好尷尬，唔想第一次見面係咁樣。」

噚晚節目開頭先簡介《造星IV》目的，然後由花姐、女團經理人Wing（戴穎）、兩位導師梁祖堯（阿祖）廷鏗分享佢哋對女團要求同期望；又播出96位參賽者為主題曲《前傳》排舞嘅片段，但就有參賽者因為工作等原因缺席，排舞室空無一人，搞到Wing同排舞師大為失望。

首輪比賽由鄭融、朱栢康及當奴（唐劍康）做評判。96位參賽者一對一對決後，勝出就可以晉級60強，落敗就會跌落復活區，然後再爭奪餘下席位。噚晚打頭陣嘅係20歲學生莎莎喺面試同自我簡介片段入面，已經喜感十足。佢話自己係從外國留學回來，學過日文、動作演員替身訓練，又學過7年粵劇，但全部都無興趣；鍾意做家務、掃地抹地、煮嘢食同演戲。

莎莎又係薛家燕旗下女團Honey Bees前成員，唔知係咪受家燕姐感染，喺面試時都跳咗十字步，但唱歌時就嚇到許廷鏗崩潰。阿祖叫佢扮天氣報導員報道天氣時，佢亦都係用搞笑tone演繹，表現趣怪，深得評判歡迎。到正式表演，莎莎就換上性感戰衣跳辣身舞，迎戰19歲一年級醫科生阿Wing（余施熲）。兩人都係表演跳舞，但結果莎莎獲兩盞燈有得留低，阿祖亦揀咗佢入自己一組。

不過，暫時落敗嘅阿Wing雖然綵排時令到花姐擰晒頭，甚至被批評「嘥時間」，但到比賽就判若兩人，連鄭融同導師仲大讚靚女。佢亦都承認自己唱歌和跳舞係災難，但仍然肯去嘗試，因為最緊要無悔。

#channelchk #全民造星IV #女團 #ViuTV #選秀真人騷 #莎莎 #坂部佩莎 #阿wing