麥記澄清雞翼Push絕無影射
李梓敬屈穎妍推上微博籲抵制 陳淨心暗指蠢人被利用

「跌咗嘢~就係咁出奇」、「唔搵佢，就會走返出嚟」，麥當勞噚日呢個push，牽起一場不大不小風波。App Push講緊嘅明明係脆香雞翼恢復供應，但有部份人士質疑麥記「抽水」、係嘲諷因水警快艇翻艇殉職嘅女高級督察林婉儀。事件短短半日迅速發酵，麥當勞同日晚已馬上澄清，有關推廣內容絕無任何不敬之意或其他含意，仲話對於推廣信息令人感到不安深表歉意。

惟有建制派人士緊咬不放，其中屈穎妍更將之推上微博，指麥當勞「大概忘了維他奶的教訓，讓我們提醒它吧」。

屈穎妍昨午已搶先於微博發文：「香港女警林婉儀高級督察因追截走私快艇墮海殉職，麥當勞竟然立即出了這樣的鬼祟帖子，他們大概忘了維他奶的教訓，讓我們提醒它吧。」麥當勞「跌咗嘢唔好搵」個Push，如果有裝麥記App，就一定收到。

維他奶事件，估計是指7月1日維他奶公司員工梁健輝刺傷警員再自殺，事後網上傳出一份公司內部聲明，向死者家屬致最深切慰問，惹來內地民眾不滿發起抵制。

內地網民對於麥當勞事件所知甚少，也有人留言指：「中信是國家財政部代替國務院組建的央企，收購後的內地和香港麥當勞改名叫金拱門，這件事是不是有人故意搞事讓大家去搞垮央企？自己搞垮自己就真中圈套了。」

呼籲大家冷靜少少的還有陳淨心，於微博貼出多張截圖，提醒大家中港麥當勞均屬中信集團，「可能有黃人想利用一班蠢人去搞國營企業，不要上當。」淨心BB亦特別提到麥當勞嗰隻「船船」廣告，澄清謂該廣告早於9月11日已推出，與女警殉職毫無關係，呼籲大家唔好中計。

屈穎妍個微博po，係噚日下晝5點；陳淨心個微博po，係今早9點13分，究其內容似隔空回應緊某人咁，特別係講維他奶呢部份：「如果因為個別員工而毀了一個企業，就是中了敵人的圈套，維他奶事件就是被個別員工出的內部文件害慘了，內部文件並非真正對外的公關文件，當日洩露文件的人也是居心叵測！」

究竟淨心BB講緊邊個係蠢人？

#麥當勞 #金拱門 #李梓敬 #陳淨心 #屈穎妍 #脆香雞翼 #國企 #中信 #channelchk

＝＝＝＝＝＝＝＝＝＝＝＝＝
🔥出氣師登場！「谷鬼氣、搵我哋」🔥
如果大家有咩疑難「谷鬼氣」，不妨搵我哋「出氣師」，等我哋幫手出返口氣！