食炸蝦應唔應該食蝦尾？
日小學生問首相掀熱話

日本卡通「角落生物」近年爆紅，除咗生物造形討人喜愛，每角色都不唔同意思。其中炸蝦尾因為蝦尾太硬，經常被剩落嚟，所以佢嘅夢想就係終有一日會被食咗。日本有小學四年級學生上月就喺自民黨選舉嘅網上問答環節中，認真咁問候選人「食炸蝦時，到底應唔應該食尾巴？」已當選為新任首相嘅岸田文雄都好嚴肅咁答：「食唔食蝦尾係自己決定，不過我個人係會食嘅。」

結果食唔食炸蝦卧就成為咗熱話，連日本朝日電視台節目《羽鳥慎一モーニングショー》都用呢個topic嚟做民調，結果發現有67.1%受訪日本人都有食炸蝦尾巴習慣，其中靜岡縣同滋賀縣更是100%人表示會食炸蝦尾；有受訪者話細細個就已食炸蝦尾，覺得好香好好食，又覺得裏面含有豐富鈣質，「我絕對會食」；唔食嘅人就會覺得佢好硬，而且容易哽親。

不過，節目邀請咗營養師嚟講炸蝦尾，話蝦尾其實含豐富膳食纖維同鈣質，食咗絕非無益；禮儀專家就話，餐桌禮儀上無規定要唔要食炸蝦尾，但如果唔想食，都可以將蝦尾放置喺碟邊，咁睇落去就比較整齊美觀。所以食唔食其實都係各有所好啦！

#channelchk #炸蝦尾 #岸田文雄 #日本 #自民黨選舉 #首相