圓規未到貨架先空
錢大媽「肉山」失蹤 街市平菜變「上菜」

「不賣隔夜肉」嘅錢大媽，圓規8號波未掛，灣仔街市分店未到中午，已經連「今日肉」都冇埋。賣晒。街市菜價加咗是常識，平時買開嘅平菜，$15蚊兩紮，而家升呢變廿幾蚊；舖仔賣$25一斤生菜，阿姐見靚太猶疑嫌貴，即使出心理戰：「無㗎喇！好快賣晒！」

天文台預告今日下午4點至6點考慮改掛8號風球。經過日前獅子山8號波「扭扭擰擰」嘅教訓，市民都知天文台係「有遲冇早」；但掃貨儲糧呢，要趁早。噚日（周一）下晝圓規都未進入香港 800 公里範圍，超市日用品貨架幾乎掃清，街市更加唔使講，生意旺過年卅晚。收工先去買菜？你得到嘅只係霉菜。

由於天文台預測圓規威力勁過獅子山，市民嚴陣以待。噚日掃唔到貨嘅，今日再出動。每日中午貨架仍然堆積肉山嘅灣仔錢大媽，今朝十點左右全店八成清空。

菜價提高，街市大排長龍。學斗平時$13斤，而家賣$20斤，$35兩斤，一樣爭住俾錢。食少一兩日菜啫，又唔係急住靠食菜進行光合作用，點解大家都咁肉緊呢？

中午時段，葵興惠康都人頭湧湧，靚太排晒長龍掃貨，交流心得。貨架反映菜係最受歡迎嘅，凍肉就兩三排貨架吉咗；米供應正常，廁紙正常。食菜通便嘅朋友唔使擔心。

記緊入貨之餘要做好家居防風措施，勿停留當風地方呀！

#圓規 #8號波 #天文台 #街市 #錢大媽 #掃貨 #學斗 #惠康 #channelchk

「錢大媽」敗走北京 12間分店停業

「錢大媽」原來都會冇錢？！內地傳媒早前報道，上海多間「錢大媽」加盟店錄得嚴種虧損，要低價轉讓止蝕，而近日北京12間「錢大媽」亦都要停業，其中9間更加已經註銷。人去樓空之外，「錢大媽北京總公司」亦已被列為「經營異常」。

《新京報》引述「錢大媽」指，公司於2020年底在北京試運直營店，同時引入部分加盟店，以探索適合北方市場的運營模式。「錢大媽」亦將生意敗走北京的原因，歸咎於南、北方生活習慣及消費行為存在差異，加上疫情影響，令當地市場目前的發展狀況未能達到預期，故經過和加盟商的共同探討與評估後，決定先暫停北京當地門市的業務。

2012年在東莞成立、近年殺入香港開多間分店的蔬菜凍肉鋪「錢大媽」，於去年曾傳出委聘中金及摩根士丹利為上市負責行，集資最多5億美元於香港上市，當時報道稱最快去年底就會掛牌，但至今仍未有最新消息。

#channelchk #錢大媽 #不賣隔夜肉 #北京