梅媽知梅啟明包二奶即「閂水喉」 下最後通牒：
若不撤銷訴對《梅艷芳》訴訟 脫離母子關係

電影《梅艷芳》喚起歌迷對梅姐嘅思念，亦觸發梅姐胞兄梅啟明嘅貪念！梅啟明聲稱持有「梅艷芳」商標，入稟高院控告電影《梅艷芳》製作公司安樂影片未經其同意下侵權，要求賠償後，向來同梅啟明共同進退嘅梅媽已鬧個仔「財迷心竅」。網台節目主持潘小文噚晚（7日）更透露，原來梅媽約半年前見梅啟明「包二奶」後，決定經濟封鎖「閂水喉」，認為「咁樣揈錢法唔得喇！」估計梅啟明因為冇錢用所以打電影公司主意；梅媽仲警告梅啟明，「如果唔撤銷訴訟就脫離母子關係」，主持更形容係「最後通牒」。

網台節目《D100娛限奶媽》主持人潘小文噚晚話梅媽仍因為血壓高同氣促留院，情況尚可，但當佢知道梅啟明控告《梅艷芳》後「火都嚟埋」。主持人更引述梅媽話：「四個都係我生，點知走剩呢隻『打壞』定『躝癱』！」

對於梅啟明經常指梅艷芳欠佢好多，梅媽話因為梅姐喺遺產分配上，一蚊都冇留畀梅啟明，所以梅啟明覺得好唔公道，有怨恨，但其實梅姐留畀梅媽嘅生活費，梅媽都有用嚟照顧梅啟明，但梅媽覺得佢「攞得太多，搞唔掂！」

主持人話同梅媽對話後，認為梅媽唔係外界想像中差。而梅媽都話自己年紀大，好多事都控制唔嚟，令梅啟明自把自為，亦承認自己縱壞個仔，但強調一定唔支持梅啟明告《梅艷芳》，警告佢再搞搞陣就唔會畀面，斷絕母子關係。

梅媽又向主持人透露，電影公司籌拍《梅艷芳》時，邀請佢出任顧問，梅媽強調冇向電影公司索取金錢，只要求電影情節唔好詆毀梅艷芳。

#channelchk #梅艷芳 #梅啟明 #梅媽 #母子關係 #財迷心竅 #安樂影片 #侵權 #商標

梅媽登報斷絕母子關係 70歲梅啟明：絕不屈服，寧願去乞錢

電影《梅艷芳》去年11月上映後，梅姐大哥梅啟明入稟高等法院控告安樂影片侵犯商標並要求賠償，現年98歲的梅媽曾公開割席並斥他財迷心竅。事隔數月，梅媽終於對兒子死心，登報斷絕二人母子關係，「本人梅覃美金與兒子梅啟明脫離母子關係，此後梅啟明在外一切華洋轇轕均與本人無關。」。

從前與梅啟明「相依為命」、齊心打官司爭取「生活費」的梅媽，更向傳媒大爆是他欠債累累，才令自己走投無路； 而梅啟明則聲稱自己是因為梅媽想見孫，才借了數萬元以安排兒子從馬來西亞來港住隔離酒店。

被經濟封鎖的梅啟明又怒斥梅媽鐵石心腸，向傳媒表示會「撐到底，絕不屈服，寧願去乞錢」，更指形容年70歲的自己「嗰頭近」、「一定走得快過梅媽」。

#channelchk #梅艷芳 #梅啟明 #梅媽 #母子關係 #登報