霸氣婆婆又單膊托車喉！一周最少3次被捕獲
車房透露每星期抬2條

上星期網上流傳一張大力婆婆單手托汽車死氣喉嘅相後，引起唔少人討論。但原來呢位婆婆似乎已習以為常，因為近呢一個星期已最少3次俾人影到佢托住或用手推車運死氣喉。有車房人士仲向Channel絲透露，呢位婆婆每星期抬2條添！Channel絲都要佩服呢位婆婆有強而有力嘅肩膊呀！

話說上星期五（22日）大力婆婆單手托死氣喉嘅相係網上廣傳之後，雖然唔少網民都形容佢「十里不換肩」，又講笑話婆婆想改車，但都有人質懷疑佢係擅自拎走。不過之後有車房人士就解畫係客人唔要條車喉，所以畀婆婆拎走嘅。

雖然最後都唔知婆婆拎條喉去邊，但第2日婆婆再俾人影到佢單手托死氣喉，呢次佢嘅裝束唔同咗，但就一樣俾人覺得佢係好輕鬆咁抬住條喉周圍走。今次車房嘅人員都有同托住喉嘅婆婆「合照」，不過就只係睇到背脊，睇唔到婆婆嘅廬山真面目。

Channel絲之後都向呢間車房了解，對方就透露婆婆每星期都會抬2條喉，仲send咗婆婆另一次運喉嘅相，不過今次就見到佢用手推車嚟運喉，唔係靠「托」，唔知係咪要畀膊頭抖抖呢？

#channelchk #霸氣婆婆 #死氣喉 #車房 #回收