陸陸雞煲被罰停晚市再收食環投訴指廁所唔乾淨
嘆「聽到麻木」：若有日關門大吉請不要憤怒

旺角一間食肆「陸陸雞煲火鍋」日前被罰晚市堂食停晚市7日後，今日再收到食環通知，稱有人投訴佢哋廁所唔乾淨、無嘟安心出行等，慨嘆就算幾努力繼續做，但今次停晚市再加早前兩次打風，已損失幾十萬；加上俾facebook封鎖，搞到推優惠post都冇人知，所以都呼籲大家畀like同分享佢哋page支持。佢哋最尾仲好灰咁話，假如「有一日關門大吉，請不要驚訝，也不要憤怒。」

警方近日多次突擊巡查食肆，「藍店」、「黃店」都無一倖免，其中位於旺角白布街嘅陸陸雞煲就喺上周五（15日）晚，因為3名食客因為冇用「安心出行」或「填紙仔」，違反防疫條例而被票控，食肆負責人被捕，食肆須停晚市7天至本月22日。此外，銅鑼灣No Boundary 無邊、Softeggsboy滑蛋仔亦先後被指違反防疫條例而須停晚市，目前已重開；而石門嘅Explorer Fusion Restaurant則被罰停晚市至本月24日。

陸陸雞煲今午喺社交平台表示，再收到食環通知話有人投訴佢哋廁所唔乾淨，無嘟安心出行等，直言已「聽到麻木晒」。

佢哋仲話原本諗住慶祝今年開張十周年，但無奈喺疫情呢一年「一日做得4個鐘頭生意」；即使佢哋逆境下繼續堅持，期望將來能成為老字號餐廳，但資源始終有限，「停呢7日晚市同上星期打咗兩個八號風加埋都唔見咗幾十萬。」而且佢哋已被facebook封鎖，推出外送$0雞優惠嘅post都冇人睇到。

所以，陸陸雞煲希望大家幫手like、follow同share佢哋page，等將來做優惠可以多啲人知道，仲慨嘆「或者我哋將來再俾人拉，起碼你哋第一時間會收到先」；帖文最尾仲話「假如陸陸（雞煲）有一日關門大吉，請不要驚訝，也不要憤怒。」佢哋亦衷心感激呢幾日仍打算嚟幫襯嘅顧客，「一切在心中」。

#channelchk #陸陸雞煲 #火鍋 #黃店 #藍店 #防疫條例 #安心出行 #填紙仔 #突擊巡查

警方食環巡青衣食肆 9人無掃安心出行遭票控
BEANS食客被指無填妥紙仔 罰停晚市14日

再有食肆因食客無填妥紙仔被罰！被視為黃店的BEANS下午在社交平台發帖，指食環署及警方今到其青衣分店巡查，發現一名食客「沒有完整填寫紙仔」，有關分店將由明日（30日）起停晚市14天及只可二人一枱。

BEANS呼籲顧客入座時配合同事，準確填寫表格上各項資料，並在帖文hashtag「無奈」、「盡在不言中」。該分店明天起將提供晚市外賣自取七折。

警方今表示，青衣分區雜項調查隊、特遣隊及軍裝巡邏小隊，聯同食環署人員下午約1時突擊巡查青衣區內多間餐廳，發現3間餐廳內2男7女未有按法例掃「安心出行」二維碼，違反《預防及控制疾病規例》（第599F章），遂向他們發出定額罰款通知書。另有4名食肆負責人違反抗疫規例，接收傳票。

#channelchk #黃店 #安心出行 #填紙仔 #COVID19 #安心碼