限電令遍及全國
Apple同Tesla供應鏈受影響

內地最多係咩？除咗人，就係令。乜令物令，限娛令限韓令。最新係限電令，用佢哋嘅術語，就係「加大力度」，中國發改委直接點名青海、寧夏、廣西、廣東、福建、新疆、雲南、陝西、江蘇等 9 省節能減碳未達標，要求加強管控，其中江蘇、青海、寧夏、廣西仲係收到最嚴格嘅限電令。噚日已有消息指，限電措施已經影響到工廠生產，當中包括了部份 Apple同Tesla 供應鏈。

據日經早前報道，富士康子公司乙盛精密工業宣佈位於崑山市工廠從周日至周五暫停生產，蘇州擁有工廠嘅iPhone喇叭組件供應商康福特控股亦表示將停產五日。
不少內地網民於微博大叫突發停電，「公司瘋了，關了所有區域的空調也就算了，連辦公室照明都要關一半，照明燈才幾瓦（watt）！」係咪冇冷氣嚴重過冇燈…

限電令主要係因為內地近期燃煤短缺，加上煤價高昂，所以早於9月初已於多個地區頒布限電令，尤其係東北地區。

件事最奇怪係，其實內地東部沿海自8月底開始已出現缺電荒，9月25號開始進入各區大規模限電的供電緊急mode、提前進入「十一長假」，表面上都叫做「有序」，但東北遼寧、吉林、黑龍江三省係24號開始「無預警大規模停電」，每日無預警、動輒4至8粒鐘「突襲式斷電」。國家就安慰大家：「廣東、江蘇等地也有大規模工業限電，這是全國性的共體時艱。」

共同富裕之外，還有共體時艱。

#限電令 #共體時艱 #共同富裕 #東北 #大停電