新界北變身大都會 起捷運通白泥 鐵路貫穿深港

新一份《施政報告》出爐，特首林鄭月娥繼「明日大嶼」後，今提出興建面積達300平方公里、涵蓋元朗和北區嘅「北部都會區」；交通方面就大力發展穿越深港兩地之間的運輸網絡，包括建造連接洪水橋／廈村至深圳前海的港深西部鐵路，仲會「探討」興建尖鼻咀至白泥捷運，總之有好多嘢要起。

林鄭任內最後一份《施政報告》好似玩Sim City（虛擬城市）咁提出多項長遠規劃，包括構建佔地面積約300平方公里、涵蓋元朗和北區的北部都會區，即包括天水圍、元朗及粉嶺／上水等已發展新市鎮，及古洞北／粉嶺北、洪水橋／厦村、元朗南、新田／落馬州、文錦渡等新發展項目，預料可以最多提供92.6萬個住宅單位，足以容納250萬人居住；擁有7個跨境陸路口岸。林鄭就形容係促進港深融合發展和連繫大灣區最重要地區。

日後呢個新界北大都會將以鐵路運輸為主要骨幹，包括建造連接洪水橋／廈村至深圳前海嘅港深西部鐵路；北環線鐵路就向北延伸，經落馬洲河套港深創科園進入深圳新皇崗口岸；又探討東鐵線延伸至深圳羅湖，喺深方設一地兩檢口岸，喺現有嘅羅湖上水站中間設非過境鐵路站；又將北環線鐵路由古洞向東延伸，接駁羅湖文錦渡香園圍，再南下經打鼓嶺、皇后山至粉嶺。

不過似乎都未算勁，林鄭其中一項大計，係「探討」興建尖鼻咀至白泥捷運，話可以帶動該區同流浮山發展。流浮山喎大佬！捷運喎！想像下一邊坐捷運一邊欣賞白泥日落，全港九新界鐵路沿線車站仲多過台灣，真係好似玩緊Sim City咁，相信亦能夠方便流浮山班刀手出市區！

此外，政府建議將洪水橋╱厦村升格為新界北現代服務業中心，喺流浮山建設規模媲美數碼港嘅地標性創科設施；將正在興建、位於河套地區嘅港深創科園，與落馬洲／新田一帶整合做「新田科技城」，當中與創科相關土地料佔240公頃，又喺港深創科園設立「生命健康創新科研中心」。

林鄭喺運輸基建等方面提出多項長遠計劃，有網民就話旺角行人天橋需時23年才落成，相信今次「世界末日前都未起好」，甚至「以為玩緊Sim City（虛擬城市）」。

另有網民慨嘆「今日講咁多嘢好似全部唔關我事」。而由於政府着力發長北部鐵路發展，有人則稱「人人住地鐵上蓋......發達啦」。

#channelchk #施政報告 #林鄭 #林鄭月娥 #虛擬城市 #simcity #北部都會區 #美麗新北區 #港深融合 #新田科技城 #數碼港 #鐵路