鄧炳強：殺人犯服刑後都要正常生活
冇角色協調潘母與陳同佳會面

台灣殺人案疑犯陳同佳喺香港出獄近兩年仍未赴台自首，案中死者潘曉穎嘅媽媽今再透過網台發佈錄音，邀請陳同佳及其父母、保安局長鄧炳強、警務處長蕭澤頤、協助陳嘅聖公會教省秘書長管浩鳴，周三上午到政總公開會面。管浩鳴表明唔會出席；鄧炳強亦指保安局唔會協調會面。被問到市民或擔心喺街上撞到殺人犯，鄧稱「香港有好多殺人犯」，好難控制大家點諗，重申陳同佳服刑後已係自由人，要過正常生活，形容陳係「好願意希望返台灣承擔嘅人」。

管浩鳴透過電話短訊回覆傳媒查詢時表明唔會出席，「我相信大家都清楚台灣方面暫時不同意簽發入境証給同佳回台自首。台灣律師在早前已代表同佳向有關部門表示回台自首的意願，暫時未有進一步消息。」

而特首林鄭月娥今日出席活動時，雖然未有回應特區政府官員會否出席會面，但鄧炳強接受《有線新聞》專訪時，被問到潘媽媽希望與陳同佳直接對話，保安局會否從中協調，鄧即表明：「喺呢件事上保安局沒有角色，一個人是否願意見另一個人，法例入面冇要求。」

記者提到早前嘅西環的士司機謀殺案，指疑犯在逃時，警方已多次講疑犯極度危險，呼籲大家要小心，但點解對待陳同佳就好似冇咁着緊？鄧炳強認為兩個情況係有唔同：「陳同佳喺香港所犯嘅法例，已經服刑完畢。一個係殺人後潛逃嘅犯人，另一個戚很願意希望回台灣承擔嘅人。」

對於市民或驚喺街上撞到殺人犯，鄧炳強就話「每個人個心點諗我好難控制，香港亦都有好多殺人犯，坐完監出嚟都係一個人嚟，都要正常生活。」當記者追問係咪即係要大家原諒陳同佳？鄧未有正面回應，重申法例上呢個人喺香港罪行已完結、已服刑。

《立場新聞》今日報道，下午曾追問周浩鼎會否出席周三嘅會面，但周浩鼎話啱啱收到消息，「我未知道，可唔可以我了解一下詳情先？」當記者再問佢了解完會否公開交代其意向，周都係繼續話要了解下先。

陳同佳2018年涉嫌喺台灣殺害女友潘曉穎，返港後因為「處理犯罪得益罪」入獄，更觸發政府修訂《逃犯條例》。民建聯李慧琼同周浩鼎當時曾協助潘曉穎媽媽開記招要求修例，但潘母事後曾話兩人召開記者會後，再無與她聯絡。對於社會亦有聲音質疑民建聯冇再跟進，李慧琼曾反駁稱周浩鼎仍有與對方定期溝通並跟進。

#潘曉穎 #潘媽媽 #陳同佳 #鄧炳強 #管浩鳴 #李慧琼 #周浩鼎 #香港警方 #台灣殺人案 #殺人

潘媽爆李慧琼花言巧語呃信任 卻「人間蒸發」
斥周浩鼎「做人唔頂天立地」！
嘮動新聞： https://youtu.be/0njXhOAoZwA

台灣殺人案死者潘曉穎媽媽原邀請案中疑犯陳同佳、保安局局長鄧炳強、牧師管浩鳴、及民建聯立法會議員李慧琼及周浩鼎等，今早（20日）喺政府總部外公開對話，但獲邀人士最終無人出席。潘媽媽批評佢哋「無個夠膽出嚟面對我」，仲大爆當年李慧琼及周浩鼎用「花言巧語」欺騙佢可提供協助，但最終「人間蒸發」，將所有責任卸予管浩鳴。

潘媽媽在記者會開場發言時，道出今日主題為「人在做、天在看」。佢坦言預咗所有獲邀請人士「無個夠膽出嚟面對我」，「其心不正嘅人當然唔會見我」，又形容佢哋再喺港人面前出醜多一次。

潘媽媽又逐一批評缺席人士，指自己只係一個阿媽，唔識政治，當年女兒突然被謀殺，「當事六神無主，被你花言巧語呃我話一定幫到我，你哋話好有辦法，但最後你哋究竟幫到我啲咩，連電話都唔覆個，陳同佳出獄後所有嘢都卸畀管牧，之後就人間蒸發。李慧琼！你唔係氹我話一定幫到我咩？去做嘢啦！唔該你。周浩鼎！你做人一啲都唔頂天立地呀！」

潘媽媽續說，2019年2月民建聯同佢召開記招前夕，兩人向佢表示有條例可以幫到阿女，「我當時以為係好有希望，但太多聲音反對修例，我一開始就不斷同周浩鼎講，擔心陳同佳案做唔到，但當時政府態度係十分之強硬。呢兩個人叫我千祈唔好出嚟，唔好出聲」，等佢哋討回公道，狠批兩人敗壞民建聯家聲。

#channelchk #陳同佳 #台灣殺人案 #潘曉穎 #潘媽媽 #鄧炳強 #李慧琼 #周浩鼎 #管浩鳴

管牧稱對得住良心 潘母哽咽質疑發死人財：
借陳同佳呃曝光 有資格牧眾？阿女都係聖公會
嘮動新聞： https://youtu.be/0njXhOAoZwA

台灣殺人案死者潘曉穎嘅媽媽今早喺記者會，逐一點名批評未有出席會面嘅人，質疑協助疑犯陳同佳嘅聖公會教省秘書長管浩鳴牧師，利用陳同佳「嚟呃曝光率」幫自己參選，又處處維護陳同佳，有如其代言人，沒資格做牧者帶領信徒；反問對方會否同樣保護其就讀聖公會學校嘅女兒。

潘媽媽原邀請保安局局長鄧炳強、聖公會教省秘書長管浩鳴等公開會面，但無人應約。潘媽媽在記者會上逐一點名批評未有出席嘅人，質疑管浩鳴利用勸服陳同佳赴台投案，喺參選選委時爭取曝光率，最後未能當選後，以為可「金盆洗手」，但被記者連番追問後，意外爆出陳同佳住安全屋，「搞到政府唔知點同納稅人解釋，要長期養住殺人重犯」。

潘媽媽促請管浩鳴「唔好再扮傻落去，係咁死話台灣唔批簽證畀陳同佳投案，你自己反省一吓，自己有無資格做帶領信徒嘅牧者」。潘媽又批評管浩鳴只係陳同佳代言人，「處處保護陳同佳」，質問管浩鳴有冇真心幫助其女兒，「阿女都係聖公會嘅學生」。講到呢度，潘媽語帶哽咽話，希望管對得住信徒、對得住良心，真心為阿女着想，讓陳同佳得到審判，讓女兒死得瞑目。

管浩鳴回覆傳媒查詢時表示，明白潘媽媽嘅心情，話希望陳同佳赴台自首，相信係為潘曉穎沉冤得雪最好方法，並強調自己喺呢件事上，絕對「對得住良心」，形容「人在做、天在看」。

#管浩鳴 #潘曉穎 #陳同佳 #台灣 #牧師 #聖公會 #鄧炳強 #安全屋 #channelchk #台灣殺人案 #潘媽媽

潘媽媽已申保護 惟警方「無做任何嘢」
鄧炳強稱盼台方憐憫一下潘母
嘮動新聞： https://youtu.be/0njXhOAoZwA

台灣殺人案死者潘曉穎嘅媽媽今早在記者會會見傳媒時，稱已向警方申請人身保護，但對方「無做任何嘢」；並指疑犯陳同佳可隨時殺人，港府卻准許佢通街走，漠視港人性命，形容「香港已成功成為「逃犯天堂」。

潘媽媽原邀請案中疑犯陳同佳、保安局局長鄧炳強、牧師管浩鳴、及民建聯立法會議員李慧琼及周浩鼎等，今早（20日）喺政府總部外公開對話，但獲邀人士最終無人出席；潘媽媽批評「無個夠膽出嚟面對我」。

她說，政府負責官員收取納稅人支付嘅人工，但「乜都懶理」。而台灣已表明可將證據送回香港審理，她已就事件多次致函有關部門，但當局回覆只稱「台灣政治操弄」等。她要求港府，一係喺香港審理案件，一係將陳同佳送上飛機，等佢去台投案。

潘媽媽質問鄧炳強時，指陳同佳只喺香港完成洗黑錢罪服刑，但未就殺人罪去受刑罰，可以做返普通人；並指陳已公開承認殺害其女兒，亦可「隨時殺人」，但政府「可以畀佢通街走」，認為係唔重視港人生命，形容「香港已成功成為『逃犯天堂』。」

而鄧炳強於潘媽媽記者會約一小時後現身立法會，但未有正面回答為何缺席與潘媽媽會面，只反覆指摘台灣當局「政治操弄」，令陳同佳無法赴台投案：「成件事就係台灣…中國台灣當局唔願意俾佢返去，佢要用一個政治操弄嘅原因唔俾佢返去，其實成件事係喺台灣發生，所有證據都喺台灣。」

「你做任何政治操弄，都唔能夠改變台灣係屬於中國一部份嘅事實。所以我希望，中國台灣當局摒棄政治操弄，攞返人性、攞返公義，容許陳同佳返去，就住自己行為負上責任。」

對於潘媽媽稱曾向警方要求提供人身保護，惟一直不獲回應。鄧指，「任何人等包括潘媽媽，如果認為人身係受到威脅，佢係可以隨時同我哋警方聯絡，我哋會根據機制同風險去決定是否提供或者提供乜嘢程度嘅行為。」

此外，鄧炳強接受傳媒專訪時稱潘因為台灣「政治操弄」，拒批陳同佳入境，希望台灣當局「憐憫一下潘媽媽」，讓陳入境自首。潘媽媽在記招回應稱，呢兩年與當局書信溝通，對方「一直以copy形式」，只重申港台無司法互助、管轄權問題等，但她相信港人眼睛雪亮。

潘媽媽又表示，相信中聯辦主任駱惠寧已領悟到香港官員的辦事能力，希望駱可關注其女兒被殺案件。

#channelchk #陳同佳 #台灣殺人案 #潘曉穎 #潘媽媽 #鄧炳強 #李慧琼 #周浩鼎 #管浩鳴

潘曉穎媽媽原本邀請涉嫌在台灣殺死女兒嘅疑犯陳同佳、保安局局長鄧炳強、協助陳同佳嘅牧師管浩鳴，以及當年聲稱協助潘媽嘅民建聯立法會議員李慧琼及周浩鼎等，今早（20日）喺政府總部外公開對話，但眾人無出席。潘媽批評佢哋「無個夠膽出嚟面對我」，仲大爆當年李慧琼及周浩鼎用「花言巧語」欺騙佢會提供協助，但最終「人間蒸發」。

睇片👉 https://youtu.be/0njXhOAoZwA

#channelchk #陳同佳 #台灣殺人案 #潘曉穎 #潘媽媽 #鄧炳強 #李慧琼 #周浩鼎 #管浩鳴

＝＝＝＝＝＝＝＝＝＝=＝＝＝＝
記得Like、Share、Comment條片，Subscribe我哋YouTube Channel，仲有撳埋鐘仔搶先睇片喇！
https://www.youtube.com/ChannelCHK