林家謙《二十五小》啖啖譚仔味 姐姐和唱勁pro
七師傅新制服行catwalk 賀25周年

「諗唔到食乜就食譚仔」，唔知大家係咪同Channel絲一樣都有呢個習慣呢？不過唔講都唔知，原來譚仔大過Channel絲㗎！譚仔25歲生日，梗係要做返啲嘢賀賀佢，就係「譚仔廿五載情如初見」活動啦！有啓動禮啦、廿五周年主題曲啦、慈善義賣啦、《譚仔．姐．遮》藝術展覽啦，仲有之前嘅「譚仔姐姐2046未來制服設計比賽」等。

首先聽下由人氣創作歌手林家謙作曲作詞同主唱、譚仔姐姐女聲合唱團和唱嘅主題曲《二十五小》先啦，淨係睇歌名都知啖啖「譚仔」味呀！呢首歌嘅MV取景於譚仔嘅「根」——深水埗。個MV嘅內容簡單啲講，就係家謙細個食完米線唔夠錢畀，譚仔姐姐見到就笑住收埋佢張單；到家謙大個仔，佢就學個姐姐幫個學生哥埋單。途中家謙仲途經咗好多個深水埗而家嘅地標，即使而家深水埗唔同咗好多、多咗好多文青Cafe，但譚仔同譚仔姐姐都係唔會變㗎～睇完個MV，除咗彷彿聞到譚仔陣味之外，Channel絲想講，睇開Channel C嘅人都知我好窮，如果家謙都可以幫我埋單就好啦～

譚仔國際集團CEO劉達民喺啓動禮到話，慶祝活動融合咗譚仔一貫「取諸社會，用諸社會」嘅經營理念，希望譚仔未來能夠繼續發揮創意，喺努力發展業務嘅同時，都可以積極回饋社會。CEO呢番話唔係講假㗎，譚仔今次搵咗6位本地插畫家：CHEAP CENTURY的蘇泳康、謝曬皮、PLASTIC THING、奶茶通俗學的崔氏兄弟、包川田和羅浩光，參與創作又靚又特別嘅「譚仔遮遮」，亦宣佈將透過協康會向有特殊教育需要嘅低收入家庭送出2,500套米線餐飲禮券。幫到人之餘，又推動到本地創作，好滾動呀～

喺啓動禮上，「星級譚仔姐姐」的七師傅仲聯同ViuTV藝人沈殷怡同劉沛蘅，一齊着住由HKDI學生設計嘅2021全新譚仔制服行catwalk。七師傅話，淨係佢流利嘅「譚仔話」，已經足以令佢勝任譚仔姐姐呢個角色，仲讚自己人生第一次喺公開活動行catwalk都表現得好好。

#channelchk #譚仔 #譚仔遮遮 #林家謙 #二十五小 #七師傅 #沈殷怡 #劉沛蘅 #制服誘惑 #catwalk #謝晒皮 #插畫 #plasticthing #cheapcentury #賤人新世紀