港鐵為飛甩車門送1,000 MTR分表歉意
「小小心意」可以做啲乜？

港鐵銅鑼灣站一列列車噚晚（2日）收工繁忙時間發生罕見「飛甩車門」意外，癱瘓港島線交通，大批乘客要轉搭其他交通工具，搞到港島多處巴士站、電車站都大排長龍，打工仔好夜先返到屋企。所以港鐵今日都透過MTR Mobile App送上「小小心意」，就係送1,000 MTR分畀登記用戶，話感謝大家體諒，真係多～謝～晒～！

睇下大拿拿1,000分可以換啲乜先？佢個App話6,000分先換到兩張10蚊車費折扣優惠，或者1程免費本地車程，而家送1,000分即係送咗3.333333333......蚊？錯喇！因為首先你要有幾千分先換到呀！如果冇裝App呢？咁就係咁先喇！因為要係12月2日或之前登記用戶先有嘅。

事發噚晚6點幾，一列載有過千名乘客、往堅尼地城站嘅列車駛入銅鑼灣站時，第一卡車廂嘅車門突然甩咗，跌落路軌，搞到灣仔至鰂魚涌站列車服務喺繁忙時間一度暫停近3個鐘。港鐵初步推斷係隧道廣告牌部件移位，與車門碰撞引致意外，而涉事廣告燈箱就咁啱係宣傳MTR Mobile App跨App換獎分嘅廣告嚟。

#channelchk #港鐵 #甩車門 #飛甩車門 #港島綫 #故障