生女禮物
大劉甘比放售歌賦山里萬呎獨立屋 呎價14萬

私有化華置之後，大劉劉鑾雄同太太甘比（陳凱韻）又賣嘢——賣豪宅！市場消息透露，今次放售嘅，係大劉送畀甘比嘅生B禮物：山頂歌賦山里逾5千呎獨立屋。有私家泳池，天台面積1,717呎，業主叫價6億元，呎價約14萬元，挑戰屋苑新高。

資料顯示，相關洋房早於2009年趁低吸納以約1.8億元購入，而且透過海外公司名義持有。傳媒翻查土地註冊處資料顯示，單位去年曾有一項貸款押記，由華置行政總裁甘比陳凱韻簽署。

翻查資料，09年1月大劉趁低吸納、購入柏寧酒店陳氏家族嘅山頂歌賦山里3B近6千呎獨立屋，送畀甘比作為第一份生女禮物（大女劉秀樺）。生女之前，大劉已經將6千幾萬嘅Mayfair豪宅送畀甘比，咁生女禮物當然更豪。

歌賦山里3至5號由會德豐發展，成個項目得5幢獨立屋。獨立屋面積由4千至5千幾呎，樓底特高，落地玻璃窗特大，車房仲大，有私家恆溫泳池。每座皆坐北向南遠眺南區海景。

大劉當年送畀甘比嘅3B獨立屋，樓高兩層，面積5,657呎，花園面積更達5,314呎，係五幢獨立屋之中最大。當時小小超李澤楷都去過睇樓。

華置（0127）股價近期因恒大（3333）危機跌至18 年低位，大股東「大劉」劉鑾雄即出手，上月頻繁沽出恒大股份，本月初再提出以每股作價4元私有化華置，實際只須支付約19.1億。甘比話，私有化係向小股東提供套現良機，將所有風險轉移至其本人身上。私有化後，甘比將持有華置62.92%，其子女則持有37.08%。

一買一賣。講到賣嘢，藏品無數嘅大劉，自去年開始頻頻割愛拍賣，由名酒、古董家具到名畫都有。其中去年10月首次在蘇富比舉行「劉鑾雄窖藏佳釀」專場，117件佳釀全部售出，成交額達5,300萬，遠超拍賣前估價2,570萬元。今春再度舉行Part 2。

曾有報道指，大劉積極拍賣，純粹因甘比認為佢藏品太多，所以建議佢將小部份非經常觀賞嘅藏品拍賣。單係去年只係拍賣已袋8億。不過，大劉嘅藏品／另類投資唔止200億，8億都係濕濕碎。

#大劉 #甘比 #歌賦山里 #獨立屋 #財技 #恒大 #channelchk