查理斯威廉王子攜眷出席
007首映見證皇室變遷

No Time to Die，港譯《007：生死有時》，台灣譯《生死交戰》。內地版本最傳神，唔得閒死。無暇赴死。香港人心聲。

作為Daniel Craig最後一套007電影，因應疫情，No Time to Die由唔得閒死變唔得閒上，映期由去年2月推到去年4月，再推到11月，然後再再推到今年4月。結果，聽日終於上映。英國時間噚晚倫敦舉行全球首映，Daniel Craig變身粉紅教主型到無話可說，女特工Ana de Armas性感造型亦搶鏡。但唔夠皇室成員搶fo。今集皇室派出嘅代表係王儲查理斯伉儷同威廉王子夫婦。凱蒂身穿身Jenny Packham 特別訂製斗篷式金色晚裝，一身金色調配搭，網民話：「直接是本片女主角了吧？」

今次首映防疫措施嚴謹，要有48小時內有效快速檢測陰性結果證明。入到首映場地Royal Albert Hall就可以除口罩，大會仲提供James Bond Martini味爆谷——Shaken, not stirred.

皇室成員出席007首映幾乎成為禮儀，Daniel Craig 5部電影亦反映皇室家族的關係轉變。06年《新鐵金剛智破皇家賭場》（Casino Royale）請來英女王伊莉莎白二世出席，之後嘅《量子殺機》（Quantum of Solac）由威廉王子同哈利王子代表參加；2012年嘅《智破天凶城》（Skyfall）就係查爾斯王子與卡米拉一齊出席。

15年《鬼影帝國》（Spectre）就係威廉王子夫婦同哈利一齊出席，嚟到Daniel Craig 最後一部007，皇室要應付梅根嘅自製新聞，應該都No Time to Die。

#生死有時 #NoTimeToDie #DanielCraig #英女王 #凱蒂 #查理斯王子 #威廉王子 #哈利王子 #channelchk