姜濤紀錄片《答案》Ep.1
「帶你認識真正的我」

19歲拎《造星》冠軍、20歲出頭拎埋《叱咤》兩項大獎，仲做埋最年輕得主，今年22歲嘅 姜濤 ，達成咗好多人一生都未必完成到嘅目標。台上認真、有台風嘅姜濤，吸引咗好多妹妹Fans，而台下成日笑、似返個小朋友嘅姜B，亦都吸咗好多媽媽Fans。不過，廣告越接越多、Show要出越密，加上摯友意外離開，姜濤開始出現唔少令Fans擔心嘅情況—不適暈倒、笑容減少、IG Story放負、黑面⋯⋯種種跡象，可能好多人覺得姜濤變咗，唔知佢而家到底仲係咪以前樂天嘅姜B，如果你想搵原因，咁你要去睇MIRROR官方幫姜拍嘅紀錄片—《答案》。呢段紀錄片，唔只係拍畀Fans，仲係一個畀姜濤再認識自己號契機。

MIRROR YouTube喺今晚Upload咗《答案》嘅第一集，一開始就見到姜B同肥仔練跳《特務肥姜》嘅場景，肥仔仲同姜B喺鏡頭前鬥嘴，串姜「佢係一個不知廉恥嘅𡃁仔嚟㗎～」，但姜聽完笑得好開心。練完舞去街場打波，完全睇得出姜B同普通男仔一樣，打街場都係會火爆。打到一身汗，姜B仲特登好尷尬咁同鏡頭講，因為驚自己污糟，唔想俾等緊佢嘅Fans攔住，所以要CamMan一陣跟佢跑走。鏡頭一轉，姜B同擔心佢嘅大家講點解會出「I'm tired of everything」嗰個IG Story，佢提起某日工作後突然情緒低落、覺得迷失、抑壓，甚至剎那間覺得自己有抑鬱，所以先忍唔住出Story。

呢集用咗姜B同花姐嘅羈絆做結束，姜B喺補錄歌時從人哋口中知道花姐讚佢唱得好有感情，跟住係咁追問到底花姐仲講咗、讚咗啲乜。姜B同鏡頭講，佢好少會約花姐食飯，但就好多嘢都會話畀佢知，包括連媽咪都未必知嘅嘢，「我會同佢講我私底下嘅嘢囉，呢個就係一個我會信任佢嘅一個行動。」

段片上傳咗幾個鐘，已經有好多姜糖留言支持偶像，仲話無論「答案」係乜，都會無條件支持姜濤，又叫姜濤唔好在意其他人心目中嘅「答案」，「只要堅持做自己，就係最好嘅答案」。

#channelchk #全民造星 #姜濤 #花姐 #答案 #紀錄片

《答案》Ep2 愁爆姜濤一見隊友就笑
姜糖為偶像打氣：唔應該肆意揣測佢為人

姜濤嘅個人紀錄片《答案》嚟到第二集，今集由姜濤出席活動暈低嘅鏡頭開始。難掩愁緒嘅姜濤向鏡頭坦白，話之前承諾見粉絲個陣一定係開心，但當後來慢慢受到大家嘅期待，反而令壓力越嚟越大，唔知點算。

不過一個人嘅姜濤，可能好悶悶不樂、面無表情，但當同返12子一齊，成件事就唔同晒。笑Lokman扮草泥馬、突登吹Anson Lo條頸想激嬲佢⋯⋯喺隊友面前，姜濤好多時候都仲好似姜B。年中有報道寫話Edan 舉中指「欺凌」姜濤，花姐喺紀錄片入面都有講笑咁問返Edan做咩舉中指，Edan就話無諗過欺凌呢個字會出現喺佢身上，因為多數人地都係欺凌佢。呢個時候企喺隔離聽嘅姜濤就開始喺到笑，又扮傷心咁反問返Edan「咁樣係玩咩？🥺」，然後Edan大叫「畀條生路行吓！😢」，兩個人笑埋一嚿。

鏡頭一轉，到姜濤自己一個上台唱歌，其他11子都有到場，喺台下聽得好投入，盡情為姜打氣，老闆AK仲對住鏡頭畀心心。12子感情如何，大家不言而喻，旁人點猜測有無內訌、分唔分上、下弦，呢刻都唔再重要。

片尾仲有姜糖為偶像打氣，「佢係一個咩人，我哋唔應該肆意揣測，然後認為自己了唔了解佢囉」、「無論將來條路點樣都好，我哋都會喺台下繼續支持佢」。

#channelchk #姜濤 #答案 #MIRROR #姜糖