《披荊斬棘的哥哥》新相被批老套、P過龍
黃貫中神情呆滯 Style勁似「忘了愛」

中國早前嚴格規範內地娛樂圈，又下令禁「娘炮」，令好多行開妖繞路線嘅偶像，都要留返啲鬍鬚同操返大隻自保。好彩，識睇嘅一定睇《披荊斬棘的哥哥》，雖然呢班哥哥平均應該都年屆40，但除咗最近有人「飲湯」要打格仔之外，佢哋完全無人受「娘炮」令影響，仲影咗輯潮到濕度99%嘅相添～

《披荊斬棘的哥哥》上星期擺咗輯相上官方微博，興奮到Channel絲對眼爭啲流產。唔浪費時間，講啲大家都識嘅港星啦～首先就係三七面望鏡頭嘅「Laughing哥」謝天華，今次佢唔扮古惑仔，唔扮警察，而係扮小飛俠，可能因為唔想單手爬山掛；輪到前機師張智霖，佢一臉唏噓嘅鬚根、略帶油膩嘅眼神，初哥哥嘅氣質已經絲毫不復見；再嚟大家都識嘅「山雞」陳小春，一身紅色長反領背心、再GEL個雞冠頭，睇得出佢從來都無放低過山雞呢個角色。Band友黃貫中同MC Jin同組，着到全身黑、戴埋條鐵鏈喺頸嘅佢，如果你唔講，我真係唔知呢個神情呆滯嘅人同黃貫中有咩關係。而好耐無見，唔知點解要戚眉嘅MC Jin，Channel絲咁岩個Mon有點嘢污糟咗，眼花睇錯，爭啲以為有人係香港深山走咗上去拍節目⋯⋯

畀呢輯相狠狠驚艷嘅唔止Channel絲，有大陸網民都留言批評啲相P過龍同老套，「是節目組沒錢了嘛？」、「黃貫中的臉是不是P過頭了，怎麼這麼長」、「你們的美工不行」⋯⋯呢班網民真係好錫呢班大灣區哥哥，鬧美工、鬧Stylist、鬧節目組，但完全無人講一句哥哥們嘅不是，完全係True Love。MIRROR之前就慘啦，賣吓廣告都要畀大陸網民質疑點解紅，又話佢地「醜」，睇嚟文化差異就係咁解。

睇晒啲相，Channel絲有啲擔心呢班大灣區哥哥，你知啦，今日「娘炮」畀人禁，聽日「娘」可能都要畀人禁㗎嘛～

#channelchk #披荊斬棘的哥哥 #陳小春 #大灣區哥哥 #謝天華 #張智霖 #山雞 #黃貫中 #MCJin