8舊水睇林鍾一戰LIVE？
白髮梁榮忠拍新片：直頭係科幻小說

「我錯！我膚淺！我對唔住大家！」林鍾一戰今晚上演。呢場「生死之戰」、「大多你100萬」，真係令人期待。最期待之處唔係輸贏，而係紅隧嗰堆巨型廣告牌，終於可以下架。

Clarify番，林鍾一戰正名係《無敵盃》，LIVE只限「鍾培生Derek Cheung」YouTube頻道會員收看，月費$800；加入成為會員後，每月仲有回饋贈送。如果你只係「培生BB」level（月費$25），對唔住，咁暴力嘅場面，你唔啱睇。

呢個月費$800嘅「培生培心」之友，鍾培生表示係為咗發放正能量，「共創更好明天」，仲話搵「頂級金融專家」傾下偈：「我會用一個好mild嘅方式同佢哋溝通，為大家提供最update嘅financial知識」。點解好似講到套料咁… 如果唔mild，唔通打擂台咩……唔係講笑，鍾培生話佢會同HKA職業選手陪大家定期打機。

睇番鍾培生YT Channel「預覽」影片，咦，原來今晚為拳賽評述嘅梁榮忠都拍咗條片，但得15秒，應該係付費先睇到全片。鏡頭前只見忠仔話：「大師兄嬌喘一聲倒在外賣仔懷裡——仲用呢句？Out咗喇喎，武俠小說今次用唔著喇，鍾培生同林作打到上擂台，直頭係科幻小說。」

冇見一排，忠仔白髮好似又多咗。《破壞之王》都已經係上世紀1994年嘅事。忠仔都57歲，變忠叔喇。

至於本文一開首道歉嗰個係邊個？係一位道歉時露出胸部嘅仁兄。杜汶澤。佢噚晚睇完林鍾一戰過磅條片同相，有感而發：「我今日先知，原來上台打拳，係咁嘅身材！白雪雪，滑捋捋咁，咁至叫做靚！當日我做多咗！唔知個醜字點寫，49歲人操到咁，把X咩？我以後唔敢喇⋯⋯無咩事我去食個陳家涼麵做宵夜喇。」配圖係佢成身muscle打擂台嘅相。

有網民留言笑：「又冇人俾一球嘢要揼你。惟有攞個body出嚟曬啦！」俾阿澤一句ＫＯ：「玩咩！我一個月開支都唔只一球啦！」作家高慧然都睇唔過眼：「而家拳手興肥肥白白短短……」

今晚真係唔知點算…

#無敵盃 #林鍾一戰 #林作 #鍾培生 #梁榮忠 #channelchk