加拿大姜糖賀《蒙著嘴說愛你》破千萬views
籌近四萬港元捐SickKids病童醫院

姜濤@MIRROR嘅《蒙著嘴說愛你》，除咗個歌名夠晒Sweet，歌詞亦都充滿正能量，好似「天給我貧病困苦 笑著去吃苦」、「生活在劫難裡 心靈從未給沾污」呢幾句，相信唔少生活喺病痛折磨之中嘅人，都會對此別有一番感受。而出歌嗰陣，姜B都曾經話過「冇咩係解決唔到，包括疫情」，希望首歌可以鼓勵到其他人。

成日都話「有咩偶像就有咩Fans」，其實呢句說話都唔一定係負面嘅。就好似一班加拿大姜糖為咗慶祝《蒙着嘴說愛你》MV破千萬views，決定要同首歌一樣為大家帶嚟正能量，集體為SickKids病童醫院發起捐款行動，將愛帶畀一班小朋友。

「姜濤Keung To加拿大應援團」本身計劃於五日內籌得$5,200加幣（約32,518港元），但除咗一班齊心嘅姜糖同鏡粉，活動仲感染咗其他好心人一齊捐款，所以目標最後超額完成，一共籌$6,280加幣（約$39,212港元） ，真係「愛接愛 人連人 可以一拼」。應援團事後喺IG公佈籌款總金額同捐款支票，再次成功感動咗唔少Fans同網民留言，「謝謝你們，這是一件很有意義的事」、「好有意義， 呢首歌本身都係疫情人帶來鼓勵」，有人仲話為自己係姜糖而自豪添。

正所謂「全憑愛令人堅持 還有各位的照顧」，有一班咁有愛嘅姜糖，真係唔怪得姜B一路以嚟咁有毅力呀！

#channelchk #姜濤 #MIRROR #蒙著嘴說愛你 #姜糖 #SickKids #病童醫院