觀塘撞車黨扮飛鼠撲向私家車
司機乘客被嚇窒：嘩！佢自己行埋嚟㗎喎！

明明已經過咗農歷七月㗎喇，點解揸揸下車無啦啦都會有啲白色嘢彈出嚟嘅？觀塘周日（24日）有司機遇上撞車黨，涉事車Cam片在網上瘋傳，片段顯示，當車駛到麗港城茶果嶺道右轉茜發道時，一個着住白色衫嘅男人無啦啦撲上車頭，搞到司機都唔知畀咩反應好，「嘩！佢做咩呀？佢自己行埋嚟㗎喎！」

事發時間為夜晚八點幾，車Cam片段見到嗰位企圖碰瓷嘅男人，當時完全唔理紅燈，突然衝出馬路，瞄準架車助跑飛撲撞埋去。撲埋去之後唔知係咪見到車Cam，突然又好似無事發生咗，悻悻然上返行人路走咗去⋯⋯

其實之前旺角都曾經有撞車黨出沒，當時仲俾司機鬧佢「搵食行遠啲」。（重溫嘮動新聞：
https://youtu.be/iBDvI9nqhqw ）事隔一個月再有同類事件發生，警方就話留意到網上流傳嘅短片，強烈譴責對道路使用者構成嚴重威脅的行為，又提醒「碰瓷黨」有機會干犯「欺詐」罪。根據《盜竊罪條例》(第210章) 第16A條，最高可被判處監禁14年。

#channelchk #撞車黨 #觀塘 #私家車 #麗港城 #盜竊罪條例 #車Cam